Іndetpen kúreste psıhologııalyq ta kómek kerek – dáriger
ORAL. QazAqparat – Batys Qazaqstan oblysynda koronavırýs indetimen kúreste aldyńǵy shepte júrgen aq jeleńdi jandar az emes. QazAqparat tilshisi solardyń biri, Báıterek aýdandyq aýrýhanasynyń dárigeri Azamat Іzbasovpen suhbattasqan edi.
Azamat Іzbasov dertke shaldyqqan adamdardy emdeýge reanımatolog maman retinde tartylǵan bolatyn.
-Azamat Bısenbaıuly, aldymen tól merekeń qutty bolsyn, naýqastardy emdeý jumystary qalaı júrip jatyr, óziń nendeı úles qosyp júrsiń?
-Rahmet, meıramǵa qaramastan, kezekshilik mindetimdi atqarýdamyn. Aýrýlardy emdeýmen ınfektsıonıst dárigerler aınalysýda. Biz, reanımatologtar olardy qoldaý baǵytynda dert aýyrlaǵan jaǵdaıda qosylamyz. Naýqastar vırýsqa, bakterııaǵa qarsy dári-dármektermen emdeledi. Qosymsha syrqaty bolsa, basqa da dáriler belgilenedi. Men ózim rentgenolog retinde jumys isteýdemin. Rentgen plenkalaryn qarap, zerdeleımin. Keıbir naýqastarǵa jasandy tynys alý apparaty, ıntensıvti em alý kerek bolatyndyqtan, anestezıolog, reanımatolog retinde járdemdesemin. Transfýzıolog retinde ázirge qajettilik bola qoıǵan joq.
-Іndet naýqastarmen qarym-qatynasta bolǵandarǵa juǵa ma, qalaı oılaısyń?
-Qarym-qatynasta bolǵandardyń bári birdeı aýyra bermeıdi. Bul kóp nársege baılanysty. Immýnıtet myqty bolsa, adam kez kelgen aýrýǵa aldyra qoımaıdy. Boıynda túrli syrqaty barlar úshin qaýipti. Sonymen qatar koronavırýs juqtyrǵan adammen baılanystyń jıiligine qatysty. Buryn Covid-19-ben aýyrǵan jaǵdaıda aǵzadaǵy antıteldiń qalyptasýyna da baılanysty bolady.
-Al dert kóshede juǵa ma, aýyrmaý úshin ne isteý kerek?
-Óte tyǵyz qarym-qatynas jasamasa, kóshede juǵady deý qıyn. Óıtkeni qorshaǵan ortada, ásirese, qatty kún sáýlesinen vırýs óledi. Aýrý kóbine jabyq oryndarda, kólikte juǵady dep oılaımyn. Turǵyndardyń sońǵy kezde kóptep túsip jatqany sondaı, ózim jumys jasaıtyn ınfektsııalyq statsıonar lyq toly. Aýyrmaý úshin, árıne, saqtyq sharalaryn esh umytýǵa bolmaıdy.
-Kovıdti pnevmonııamen shatastyryp alý múmkin be?
-Munyń aıyrmashylyǵy, ádette pnevmonııa bakterııalyq ınfektsııadan týyndaıdy. Biz ony tabysty emdep te júrmiz. Al kovıd kezinde pnevmonııa qatty asqynady. Dert eki ókpeni jep qoıady, sondyqtan emdeý de qıyndaı túsedi. Sondyqtan koronavırýstyń alǵashqy belgileri baıqalǵan kezde qaralý kerek. Belgileri de ár túrli, kóbine jótel, tamaq jybyrlap, jutynǵanda aýyrady, muryn biteledi, al qyzý ár ýaqytta kóterile bermeıdi.
-Qazir aýrýhanada qansha adam jatyr, jaǵdaılary qalaı?
-Kúni búgin emdelýshilerdiń ishinde aýyr haldegiler joq. Bári de jeńil jáne ortasha aýyr kúıde. Ókinishke qaraı, jýyrda 77 jastaǵy keıýana ómirden ozdy.
-Infektsııalyq statsıonarda mamandar jetise me?
-Mamandar bar, degenmen psıhologtar kerek dep oılaımyn. Sebebi naýqastarǵa da, dárigerlerge de ońaı emes, psıhologııalyq kómek qajet bolyp jatady.
Jalpy, tájirıbeli ınfektsıonıst dárigerimiz Elena Kolpakova bólimshege jetekshilik jasasa, jas hırýrgymyz bar. Jaqynda Tasqala aýdanynan kelgen taǵy bir jas maman, saýatty terapevt Abylaıhan Sambaev qosyldy.
Komandamyz myqty dep oılaımyn. Til-kóz tımesin, indet bastalǵannan beri bizdiń bólimshedegi medıtsına qyzmetkerleri arasynda eshkim aýyrǵan joq.
Aldaǵy ýaqytta da óz mindet-boryshymyzdy abyroımen atqarýǵa kúsh-jigerimizdi jumsaı beretin bolamyz.
Eske sala keteıik, budan buryn dáriger Symbat Áripjanqyzy eger halyq shekteý sharalaryn saqtamasa, barlyq eńbek zaıa ketýi múmkin ekendigi jóninde málim etse, Elena Kolpakova úıde emdeletinder muqııat bolyp, aýrýdy asqyndyryp almaý kerektigin aıtqan bolatyn.
