Іndetpen kúresip júrip kóz jumǵan shymkenttik 9 dáriger ordenmen marapattaldy

ShYMKENT. QazAqparat - Shymkentte koronavırýs epıdemııasymen kúreste kásibı boryshyn atqarý kezinde qaza tapqan toǵyz dáriger «Qurmet», «Parasat», «Barys» ordenimen marapattaldy, dep habarlaıdy QazAqparat.

Memlekettik nagradany qala ákimi Murat Áıtenov marqumdardyń otbasyna arnaıy baryp tabystady. Budan bólek, ár otbasyna materıaldyq kómek retinde «Qaıyrymdy qala» qorynan qarjy berildi.

Qaza tapqandardyń týystary men jaqyndaryna kóńil aıtqan qala basshysy qyzmettik boryshyn úlgili atqaryp, halyq densaýlyǵyn saqtaýda tabandy eńbek etkenin erekshe atap ótti.

Esterińizge salsaq, QR Prezıdenti Qasym-Jomart Toqaev 13 shilde kúni qyzmettik boryshyn atqarý ústinde kórsetken janqııarlyǵy úshin medıtsına salasynyń marqum bolǵan birqatar qyzmetkerlerin marapattaý týraly jarlyqqa qol qoıǵan bolatyn.

Marapat ıeleriniń qatarynda aýrýhanalar men medıtsınalyq ortalyqtardyń dárigerleri, bólim meńgerýshileri, ınfektsıonıster, sonymen qatar medıtsınalyq jedel járdem stantsııasynyń dárigerleri bar.

«Qurmet» ordenimen marapattalǵandar:

- Qalalyq dıagnostıkalyq ortalyq dárigeri Kúrekbaev Baýyrjan Ordabekuly

- Qalalyq dıagnostıkalyq ortalyq dárigeri Mamaev Hasym Mahmýdovıch

- №1 qalalyq klınıkalyq aýrýhana dárigeri Málibekov Jánibek Jumashuly

- №8 qalalyq emhana aǵa medbıkesi Álmahanova Qafıza Batyrhanqyzy

- №1 qalalyq klınıkalyq aýrýhana aǵa medbıkesi Baımenova Gaýhar Ashtaıqyzy

- Jedel medıtsınalyq járdem stantsııasy feldsheri Áýelbaev Tımýr Aıdarhanuly.

«Parasat» ordenimen marapattalǵan:

- №1 qalalyq klınıkalyq aýrýhana bólim meńgerýshisi Abdıkýlova Marııam Qabylbekqyzy.

І-dárejeli «Barys» ordenimen marapattalǵan:

- № 1 qalalyq emhana terapııa bóliminiń meńgerýshisi Tajdenova Aǵzıpa Nasyrqyzy.

ІІІ-dárejeli «Barys» ordenimen marapattalǵan:

- №1 qalalyq klınıkalyq aýrýhana bólim meńgerýshisi Sadıev Orynbasar Alıpbekuly.