Іndetke tosqaýyl qoıatyn - tek qana vaktsına: Jańaózende ujymdar epıdemıologtarmen kezdesti
Qaladaǵy iri kompanııalardyń biri - «ÓzenMunaıGaz».
Ózen munaı gaz óndirý kásipkerligi sonaý 1964 jyldyń 15 shildesinde qurylǵan.
Qazirgi tańda «ÓzenMunaıGaz» aktsıonerlik qoǵamyna qarasty 16 qurylymdyq óndiristik basqarma bar.
Onyń tórteýi munaı gaz óndirý basqarmasy, al ózge basqarmalar óndiriske qosymsha servıstik qyzmet kórsetedi.
Epıdemıologııalyq jaǵdaıǵa baılanysty eńbek ujymynyń qurylym jetekshileri ǵana bilikti epıdemıolog, ınfektsıonıst dárigerlermen kezdesti.
Qyzmetkerler mamandarǵa kókeıinde júrgen suraqtaryn qoıyp, keńes surady.
Kompanııa baspasóz qyzmetiniń málimetinshe, ujymdaǵy kásipodaq jetekshileri men qurylym basshylarynyń basym bóligi vaktsına alǵan.
Mysaly, «ÓzenMunaıGaz» AQ-da 25 jyl eńbek etip júrgen bas esepshisi Anar Ospanova «Spýtnık V» vaktsınasynyń ekinshi komponentin alǵanyn aıtty.
«Vaktsınanyń ekeýin de aldym. Eshqandaı janama áser bolǵan joq. Din-aman júrmin. Men aınalamdaǵy adamdardyń qaýipsizdigi úshin vaktsına saldyrdym. Sebebi men jumysta ártúrli jastaǵy adamdarmen jumys isteımin. Sondyqtan qorshaǵan ortaǵa zııan tıgizgim kelmedi. Árbir adam óziniń jáne otbasynyń qaýipsizdigi úshin vaktsına alady dep oılaımyn»,-deıdi Anar Ospanova.
Al kompanııanyń taǵy bir qyzmetkeri tańdaý reseılik jáne qazaqstandyq vaktsına arasynda bolǵandyqtan otandyq ónimdi tańdaǵanyn aıtty.
Jalpy kompanııada vaktsına alǵandar sany myńǵa jýyqtaǵan. Mamandar qazir qyzmetkerlerdiń vaktsına alý qarqyny kúsheıip kele jatqanyn aıtty.
Sonymen qatar epıdemıologtar 2200 adam qyzmet etetin «Byrgylau» JShS ujymymen de kezdesti.
Mekeme dırektory Dúısenbaı Taýshanovtyń aıtýynsha, 154 adam vaktsına alǵan.
«Bizdiń kompanııada 29 qurylym aýtsorsıng formatynda jumys isteıdi. Sonyń barlyǵyn qosqanda 2200 adamdy quraıdy. Keńsede jumys isteıtin qyzmetkerlerdiń 154-i vaktsına alyp otyr. Men jaqynda «Spýtnık V» vaktsınasyn alamyn. Osyndaı mamandarmen kezdesip, suraq-jaýap sessııasyn ótkizý qyzmetkerlerge jaqsy áser etip jatyr. Búgin olar barlyq qyzyqtyrǵan suraqtaryna jaýap aldy»,- deıdi Dúısenbaı Taýshanov.
Bul mekemeden keıin epıdemıolog mamandar men jergilikti bılik ókilderi Munaıshy mádenıet úıinde «ÓzenInvest» MKK ujymy men bilim salasynyń qyzmetkerlerimen jolyqty.
Qalaǵan qala turǵyndary da jıynǵa kirip qatysty.
Sharada medıtsına ǵylymdarynyń kandıdaty, epıdemıolog Aınagúl Qýatbaeva kez kelgen vaktsına syrttan organızmge túsetin aqýyz ekenin aıtty.
«Іndetke tosqaýyldy tek vaktsına ǵana qoıa alady. Byltyrǵy aqpan aıynan bastap buqaralyq oryndarǵa barmańyz, bata jasamańyz, 10-15 adamnan jınalatyn jerge barmańyz dep eskertip jatyrmyz. Sebebi Túrkistan oblysyndaǵy qarııa Jambyl oblysy, Kókshetaý qalasyna, Qaraǵandyǵa baryp, 180 adamǵa indet juqtyrǵan. Sonyń jeteýi indetten kóz jumdy. Sondyqtan vaktsına alǵan kúnniń ózinde de sanıtarlyq talaptar týraly umytpaǵan jón», - dedi Aınagúl Qýatbaeva.
Sonymen qatar aqparattyq-nasıhat tobynyń músheleri 1995 jyldan beri jumys istep kele jatqan «Mańǵystaý munaı gaz» AQ enshiles kompanııasy «Mańǵystaý energo munaı» JShS mekemesiniń qyzmetkerlerine de vaktsınatsııa týraly túsindirý jumysyn júrgizdi.
Jıynǵa qatysýshylar tarapynan «vaktsına alýdyń tıimdiligi men áseri qandaı?, Alǵashqy jáne ekinshi komponenttiń arasy nege bólingen?, Jańa shtamdarǵa qarsy vaktsınany qaıta salý kerek pe?, Vaktsınany kimderge alýǵa bolmaıdy?» degen suraqtar kóp qoıyldy.
Aqparattyq top múshesi Asfendııarov atyndaǵy Qazaq ulttyq medıtsınalyq ýnıversıtetiniń juqpaly jáne tropıkalyq aýrýlar kafedrasynyń dotsenti Aınur Sadyqova halyqtyń suraǵyna barynsha jaýap berýge tyrysqanyn aıtty.
«Halyqtyń suraǵy óte kóp. Biz onyń bárine jaýap berýge tyrystyq. Tipti, keı ujym ekinshi kezdesýge shaqyryp, suraqtaryna jaýap alǵysy kelip jatqan jaıy bar. Vaktsına alýǵa eshkim qarsy emes. «Vaktsına alǵannan keıin aýyryp qalý múmkin be? Qandaı áser bolýy múmkin?» degen suraqtar da boldy. Biz túsindirý jumysyn odan ári jalǵastyrýǵa daıynbyz»,- deıdi Aınur Sadyqova.
Aıta keteıik, Mańǵystaý oblysy qazir «qyzyl» aımaqta tur. Jańaózen qalasynda vaktsınanyń alǵashqy komponentin 10424 adam, ekinshi komponentin 3933 adam alǵan.
