Inder aýdanyndaǵy on bes evakýatsııa pýnktinde 1600 oryn bar
ATYRAÝ. KAZINFORM – Atyraý oblysyndaǵy Inder aýdanynda 15 evakýatsııalyq pýnkt daıyndaldy. Onda 1600 oryn bar.
Inder aýdandyq tótenshe jaǵdaılar bóliminiń bas mamany, azamattyq qorǵaý maıory Parasat Boranbaıulynyń aıtýynsha, turǵyndardy kóshirý qajettiligi týyndaǵan jaǵdaıda evakýatsııalaý jumystaryna 150-ge jýyq qyzmetker jumylady.
«Evakýatsııaǵa qatysatyn mamandardyń qatarynda tótenshe jaǵdaılar bólimi, polıtsııa men jergilikti atqarýshy organnyń ókilderi bar. Turǵyndardy tasymaldaýǵa 20-dan astam tehnıka daıyn tur. Sý tasqyny qaýpi týyndasa, dabyl belgisi iske qosylady», -dedi Parasat Boranbaıuly.
Evakýatsııa pýnktiniń biri Inderbor kentindegi M.Áýezov atyndaǵy orta mektepte ornalasqan.
Mektep dırektory Mereke Jumashevanyń aıtýynsha, qazir munda 45 kereýet, 45 áskerı tósek-jabdyq daıyndalǵan.
«Mekteptiń sport zalynda 90 oryn daıyndaldy. Bilim ordasyndaǵy ashanadan bir mezgilde 100 adam tamaqtana alady. Qazir dene tárbıesi sabaǵyn mekteptiń aýlasyndaǵy alańda ótkizýge sheshim qabyldandy. Basqa pánder oflaın formatta ótip jatyr», -dedi Mereke Jumasheva.
Eske sala ketelik, buǵan deıin Inderde – 15, Mahambet aýdanynda 22 evakýatsııalyq pýnkt daıyn turǵanyn jazǵan bolatynbyz.
Al, Saraıshyq aýylyndaǵy evakýatsııa pýnkti 300 adamdy qabyldaı alady.
