Inder aýdanynda tasqyn qateri tónip turǵan eki aýylda 33 júkti áıel bar
ATYRAÝ. KAZINFORM — Atyraý oblysynyń Inder aýdanynda 258 júkti ana esepte tur. Onyń ishinde sý basý qaýpi basym eki aýylda 33 júkti ana bar.
Inder aýdandyq ortalyq aýrýhananyń dırektory Anargúl Dospaevanyń deregine súıensek, bosanatyn kúni jaqyndaǵan bir ana Atyraý qalasyna jiberilgen.
«Inder aýdany boıynsha 258 júkti ana esepke alynǵan. Ásirese, Jarsýat, Qurylys aýyldarynda 33 júkti ana bar. Mamyr aıynda Jarsýattaǵy — 9, Qurylys aýylynda turatyn 4 júkti ana bosanýy múmkin. Qazir júkti analardy erekshe baqylaýǵa alyp otyrmyz. Tasqyn qaýipi tóngen jaǵdaıda bosanatyn kúni jaqyndaǵan analar ortalyq aýrýhanaǵa evakýatsııalanady. Budan bólek, úı jaǵdaıynda em alyp, tósek tartyp jatqan naýqastar shuǵyl evakýatsııalanyp, aýdandyq ortalyq aýrýhana mamandarynyń kútimine alynady», — dedi Inder aýdandyq aýrýhanasynyń dırektory Anargúl Dospaeva.
Onyń aıtýynsha, Inder aýdanynda evamedıtsınalyq brıgadalar qurylyp jatyr.
Eske sala ketelik, búgin Jaıyq ózeniniń deńgeıi Inderde — 884, Mahambet aýdanynda — 861 sm boldy.
Keıin Atyraýdyń Inder aýdanynda 20 tonna azyq-túlik qory jasaqtalǵanyn habarladyq.
Sondaı-aq, Inder aýdanyndaǵy on bes evakýatsııa pýnktinde 1600 oryn daıyn tur.