Inder aýdanynda 25 myń maldy qaýipsiz aýmaqqa shyǵarý josparlanyp otyr
ATYRAÝ. KAZINFORM – Atyraý oblysyndaǵy Inder aýdanynda Jaıyq ózeniniń sýy qaýipti shekten asyp ketti. Osyǵan baılanysty 25 myń maldy qaýipsiz aýmaqqa shyǵarý josparlanǵan.
Inder aýdandyq aýyl sharýashylyǵy bóliminiń basshysy Mámbetqalı Qusaıynovtyń aıtýynsha, Jaıyq ózeniniń jaǵalaýynda 35 sharýa qojalyǵy ornalasqan.
«Jaıyq ózeninde sý deńgeıi kóterilip, qaýipti shekten asyp ketti. Sý tasqyny qaýpine baılanysty 35 sharýa qojalyǵynan 25 myń maldy qaýipsiz aýmaqqa shyǵarý josparlandy. Osy maqsatta tórt túlikti qorshaýda ustaý úshin 25 oryn daıyndaldy», - deıdi Mámbetqalı Qusaıynov.
Bul aýdanda Jarsýat jáne Qurylys aýyldary sý basý qaýpi basym aýmaqta tur. Jarsýat aýyldyq okrýginiń ákimi Erbol Bókeevtiń aıtýynsha, qazir atalǵan eldi mekenderde kezekshi pýnktteri ashylǵan.
«Jarsýat aýylynda burynnan 4,6 shaqyrym bóget bolǵan. Sol bóget tolyqtaı jańartylyp, oǵan qosymsha qosymsha 2,3 shaqyrym bóget soǵyldy. Al, Qurylys aýylynda 5,6 shaqyrym bóget tolyqtaı qaıta jańartyldy. Osylaısha, okrýg boıynsha 12,5 shaqyrym bóget salyndy. Qazir qaýipti aýmaqta turǵan aýyldarda Taraz qalasynan kelgen 52 sarbaz, Tótenshe jaǵdaılar departamentinen 21 maman jaǵdaıdy qadaǵalaýǵa aldy. Qosymsha tehnıkalar da bar», - dedi Erbolat Bókeev.
Ákimniń dereginshe, Jarsýat aýylynda 2 200, Qurylys eldi mekeninde 700 adam turady. Atalǵan okrýg úshin evakýatsııalyq pýnkt retinde Inderbor kenti belgilengen.
Eske sala ketelik, budan buryn Jaıyq ózeniniń sýy Inder aýdanynda qaýipti deńgeıden asyp ketti.
