InDepthNews agenttiginiń Bas dırektory Ramesh Jaýra QazAqparatta qonaqta boldy
ASTANA. QazAqparat - Búgin «QazAqparat» HAA Bas dırektory Asqar Ýmarov Halyqaralyq baspasóz sındıkatynyń jetekshi agenttigi «IDN-InDeptNews» (IDN) Bas dırektory, shef redaktor Ramesh Jaýramen, sondaı-aq InDepthNews agenttiginiń Tokıodaǵy basshysy Katsýshıro Asagırımen kezdesti.
Kezdesý barysynda taraptar aqparat agenttikteriniń ózara yntymaqtastyǵy máselelerin talqylady. «QazAqparat» HAA Bas dırektory Asqar Ýmarov agenttiktiń tarıhyna, onyń búgingi jumysyna toqtalyp, halyqaralyq qyzmeti týraly áńgimelep berdi.
«Biz Qazaqstannyń ǵana emes, Ortalyq Azııanyń kóptegen jańalyqtaryn «QazAqparat» agenttigi arqyly bilip, tanysyp otyramyz. Árıne, Qazaqstan jas memleket bolǵanymen, onyń bolashaqqa baǵdary salmaqty. Qazaqstan ekonomıkalyq turǵydan da, halyqaralyq yntymaqtastyq turǵysynan da álem elderi úshin qyzyqty el dep oılaımyn. Degenmen, bul el týraly halyqaralyq deńgeıde aqparattar jetkilikti emes. «QazAqparat» HAA osy olqylyqtyń ornyn toltyrý úshin qyzmet etip otyrǵanyn bilemiz. Sol úshin Sizdermen yntymaqtastyqta jumys isteý biz úshin de asa mańyzdy», - dedi Ramesh Jaýra.
Sondaı-aq taraptar búgingi aqparat ǵasyryndaǵy dástúrli BAQ róli, áleýmettik medıanyń agenttikterge áseri jóninde pikir almasyp, jańa medıanyń mańyzy týraly áńgime órbitti. Aldaǵy ýaqytta tájirıbe almasý, ásirese ekonomıkalyq aqparattardy ózara almasa paıdalanýǵa yntaly ekendikterin aıtty.
Eske sala keteıik, «QazAqparat» HAA men IDN-InDepthNews arasynda yntymaqtastyq týraly memorandýmǵa byltyr qol qoıylǵan bolatyn.
InDeptNews agenttigi negizinen BUU qyzmetine qatysty jańalyqtar men taldaý materıaldaryn jarııalaıdy. Sonyń ishinde álemniń ár túkpirindegi jańalyqtar boıynsha aqparattyq taldaýlardy, álemge jáne adamzatqa áserin tıgizetin reportajdar men materıaldarǵa qatysty óz ustanymdaryn, kózqarastaryn jarııalap otyrady. 2009 jyldan bastap onlaın qyzmetin iske qosqan agenttiktiń jelisi álemniń barlyq derlik óńirlerin qamtyp otyr. Sonyń ishinde Ortalyq Azııa óńirine arnalǵan arnaıy aıdary da bar.
Halyqaralyq uıym resmı túrde Berlınde, Sıngapýrda jáne Tokıoda tirkelgen, ortalyǵy Kanadada ornalasqan, al redaktsııasynyń shtab-páteri Nıý-Iorkte.
