INChHON-2014: Qazaqstandyq paralımpıadashylarda - segiz medal
ASTANA. QazAqparat - Ońtústik Koreıada bastalǵan Paraazıada oıyndarynda Qazaqstan quramasy segiz medal alyp úlgerdi. Ázirge quramadaǵy altyn sany bireý bolǵanymen, sportshylar el qorjynyna taǵy birneshe jeńis ákelýden úmitti.
Aıta keteıik, Paraazıada oıyndaryna qazaqstandyq 84 sportshy qatysýda.
Qurama komanda úshin alǵashqy júldeni sýda júzýshiler ákeldi. Tirek-qımyl apparatynyń múmkindigi shekteýli sportshylardyń arasynda 50 metr qashyqtyqty júzip ótken Dmıtrıı Lı úshinshi bolyp kelip, qola júldeni enshiledi. Al Ánýar Ahmetov kórý múmkindigi shekteýli júzýshiler arasynda eki márte ekinshi oryn aldy. 400 metrge júzýde ol Qazaqstan qorjynyna alǵashqy altyn medaldi saldy. Bul jeńister bizdiń sportshylardyń basqa elderden kelgen qatysýshylarǵa laıyqty básekeles ekenin kórsetti.
Dzıýdodan ótken jarysta Ánýar Sársıev Taıpeı sportshysynan basym tússe de, Mońǵolııa men Koreıanyń atletterine ese jiberip aldy. Al voleıbolshylarymyz bolsa, jartylaı fınalǵa ótip úlgerdi. Matchtar serııasynda qazaqstandyq qurama japondyqtar men mońǵoldardy utty. Sonymen birge, sporttyń arbadaǵy bı, paýerlıftıng jáne sadaq atý túrlerinen kúmis jáne qola medaldar bar. Atap aıtqanda, Qazaqstan qorjynyndaǵy 8 medaldiń 1-ýi - altyn, 4-ýi - kúmis, 3-ýi - qola. Qazaqstan ázirge 14-shi orynda. Birinshi orynda Qytaı, ekinshi orynda - Ońtústik Koreıa, al odan keıin Japonııa tur, dep habarlaıdy sports.kz.
