INChHON-2014: Іlııas Súleımenov jartylaı fınalda
ALMATY. QazAqparat - Búgin Ońtústik Koreıanyń Inchhon qalasynda ótip jatqan 17-shi Azııa oıyndarynda keshki sessııada bokstan shırek fınaldyq saıystar bastaldy.
Sharshy alańǵa shyqqan qazaqstandyq bylǵary qolǵap sheberi Іlııas Súleımenov (52 kg) jergilikti boksshy Sangdon Chýdy jeńip, jartylaı fınalǵa joldama aldy, dep habarlaıdy Qazaqstan boks federatsııasynan.
Bul saıysta Іlııas sheberlik, tabandylyq jáne jeńiske degen jigerlik jaǵynan qarsylasynan basym tústi. Onyń dál soqqylary káris boksshysynyń adymyn ashtyrmady. Ekinshi raýndta qabaǵy tilinse de Іlııas jekpe-jekti jeńispen aıaqtady. Qorytyndy esep - 2:1.
Aıta ketelik, budan úsh jyl buryn dál osy Inchhon qalasynda ótken Azııa birinshiliginde Іlııas kúmis medalge qol jetkizgen bolatyn. Endi mine, bul joly da bir júldege qol jetkizip otyr.
Endi aldaǵy 2 qazanda ótetin jartylaı fınalda Іlııas Súleımenov japondyq boksshy Shota Haıashımen qolǵap túıistiredi. Ol óz kezeginde túrkimendik Zarıp Jumaevty 2:0 esebimen jeńgen bolatyn.
Sol kúni osy salmaq dárejesinde taǵy bir jartylaı fınalda Shahobıddın Zoırov (Ózbekstan) pen Muhammad Vassım (Pákstan) kezdesedi.
Qazir sharshy alańda Danııar Eleýsinov (69 kg) óner kórsetýde. Odan keıin Ádilbek Nııazymbetov (81 kg) baǵyn synaıdy.
