In-shık Chjang: Qazaqstannyń Ortalyq saılaý komıssııasy biz úshin túrki álemine qaqpa

ASTANA. KAZINFORM – QR Ortalyq saılaý komıssııasynyń tóraǵasy Nurlan Ábdirovtiń shaqyrýymen 12-16 mamyrda Saılaý organdary dúnıejúzilik qaýymdastyǵynyń (A-WEB) bas hatshysy In-shık Chjangtyń Qazaqstanǵa alǵashqy resmı sapary boldy.

14 mamyrda Túrkistan qalasynda resmı sapardyń barysynda Saılaý organdary dúnıejúzilik qaýymdastyǵynyń bas hatshysy Túrki memleketteri uıymyna (TMU) múshe memleketterdiń Ortalyq saılaý organdarynyń konsýltatıvtik platformasy (OSO KP) týraly Erejege qol qoıý rásimine jáne «Túrki álemi: saılaý júıeleriniń dástúri, tájirıbesi jáne damý bolashaǵy» atty halyqaralyq ǵylymı-praktıkalyq konferentsııasyna qatysyp, sóz sóıledi.

16 mamyrda Astana qalasynda Ortsaılaýkomnyń keńsesinde A-WEB bas hatshysy In-shık Chjang óz saparynyń sheńberinde Qazaqstan Respýblıkasy Ortalyq saılaý komıssııasynyń tóraǵasy Nurlan Ábdirovpen kezdesti. Kezdesýge OSK músheleri, komıssııa apparatynyń jáne «QR OSK Injenerlik-tehnıkalyq ortalyǵy» RMK qyzmetkerleri, Astana men elordalyq aýdandardyń aýmaqtyq saılaý komıssııalarynyń músheleri qatysty.

Kezdesý barysynda taraptar yntymaqtastyqtyń negizgi baǵyttaryn talqylady, saılaý ótkizý, saılaý protsesterinde tsıfrlyq tehnologııalardy qoldaný, sondaı-aq saılaýshylardy aqparattandyrý jáne saılaý kezeńinde jalǵan aqparattyń taralý qaýpi máseleleri boıynsha aqparat pen tájirıbe almasty.

QR Ortalyq saılaý komıssııasynyń tóraǵasy Qazaqstanǵa alǵashqy resmı saparmen shaqyrtýdy qabyl alǵany úshin In-shık Chjangqa alǵys aıtyp, qaýymdastyqpen jemisti yntymaqtastyqty atap ótti. Sondaı-aq basqa memleketterdiń saılaý organdarymen jáne de halyqaralyq uıymdarmen yntymaqtastyqty odan ári keńeıtýge múddeliligi rastaldy.

Óz kezeginde Chjang QR OSK-na syndarly yntymaqtastyq pen saılaý salasyndaǵy halyqaralyq áriptestikti damytýǵa qosqan úlesi jáne Qazaqstannyń qaýymdastyq jumysyndaǵy belsendi róli úshin alǵysyn bildirip, elimizdiń saılaýdy ótkizýdegi ashyqtyq pen ınklıýzıvtilik qaǵıdattaryn ustanatynyn basa aıtty.

Ol sondaı-aq Qazaqstan Prezıdenti Qasym-Jomart Toqaevtyń jetekshiligimen saılaý júıesin jáne de jalpy eldi damytýdaǵy Qazaqstannyń kúsh-jigerin joǵary baǵalady.

«Qazaqstannyń Ortalyq saılaý komıssııasy biz úshin túrki álemine qaqpa dep sanaımyz. Biz tabysty yntymaqtastyq úshin birinshi kezekte qazirgi ýaqytta tehnologııalarmen almasýymyz kerek dep esepteımiz, sondyqtan biz odan ári bolashaq yntymaqtastyqqa úlken úmit artamyz. Túrki memleketteri uıymynyń saılaý organdarynyń konsýltatıvtik platformasy bizdiń urpaq úshin ǵana emes, kelesi urpaq úshin de jaqsy tetik bolady dep senemin. Bul platforma Qazaqstanmen, onyń ishinde túrki álemi elderimen yntymaqtastyǵymyzdy júıeleıdi, sondyqtan biz tyǵyz ózara is-qımyl úshin jaqsy tetik qurǵanymyzǵa óte rızamyz», - dep atap ótti Caılaý organdarynyń dúnıejúzilik qaýymdastyǵynyń basshysy.

Sonymen qatar, Chjang saılaý salasyndaǵy jahandyq trendter, saılaý úderisin tsıfrlandyrý týraly aıta kele, bul másele boıynsha qoǵamda konsensýstyń bolmaýyna jáne saılaýshylardyń tsıfrlyq saılaý tehnologııalaryna senimsizdigine baılanysty Koreıanyń elektrondy daýys berý júıelerin qoldanbaıtynyna toqtaldy.

Kezdesý ashyq, dostyq jáne kásibı túrde ótti. Kezdesý barysynda taraptar ekijaqty dıalogty, saılaýdy uıymdastyrý jáne ótkizý máseleleri boıynsha aqparat jáne tájirıbe almasýdy jalǵastyrýǵa nıetti ekenin rastady.

Kezdesý sońynda Nurlan Ábdirov In-shık Chjangqa QR Ortalyq saılaý komıssııasynyń 30 jyldyǵyna arnalǵan «Konstıtýtsııalyq reforma jáne saılaý júıesi» halyqaralyq konferentsııasynyń materıaldar jınaǵyn tabys etti.

Aıta keteıik, Senat Anastasııa Şegortsovany OSK múshesi qyzmetinen bosatty.