Importtyq taýarlardyń basym bóligi sanıtarlyq talaptarǵa saı emes - Á.Matıshev
ASTANA. QazAqparat - Importtyq taýarlardyń basym bóligi sanıtarlyq talaptarǵa saı emes. Búgin Májiliste Ekonomıkalyq reforma jáne óńirlik damý komıtetiniń keńeıtilgen otyrysynda Ulttyq ekonomıka mınıstrligi Tutynýshylar quqyqtaryn qorǵaý komıtetiniń tóraǵasy Álıakpar Matıshev osylaı málim etti. Eske salaıyq, jıyn barysynda tutynýshy ónimderin tehnıkalyq retteý máseleleri talqylanǵan bolatyn.
«Bıyl sanıtarlyq-epıdemologııalyq monıtorıng barysynda komıtet zerthanalary 80 myńnan astam ónimderdi zertteýden ótkizse, sonyń 2,5 paıyzy nemese 2 myńnan astamy talaptarǵa saı kelmeıtin bolyp shyqty», - dedi komıtet basshysy. Onyń sózine qaraǵanda, talapqa saı kelmeıtin taýarlardyń basym úlesi - ımporttyq taýarlar. Máselen, zerthanalyq taldaýlar barysynda sıyr búıreginen jasaldy delingen pashtetten shoshqa eti tabylǵan. Al sút ónimderi men irimshikterdiń maılylyǵy, aqýyzdar massasy quramyna saı bolmaı shyqty.
«Saraptamalyq jumystar nátıjesinde bas sanıtar-dárigerdiń 9 qaýlysy shyqty. Onda mynadaı ónimderdi ákelýge, satýǵa tyıym salyndy: Reseıden ákelinetin qus etteri, Avstralııadan ákelinetin muzdatylǵan sıyr eti, Reseı men Belarýs elderinen jáne úshinshi elderden ákelinetin alkogoldik ishimdik ónimderi, Ýkraına men Reseı irimshikteri, Latvııa maıshabaqtary jáne Qytaı oıynshyqtary - bulardyń bárinen jaǵymsyz sapalyq quramdar aıqyndalǵan», - dedi Á.Matıshev.
