Importtyq azyq-túlik ónimderdiń úlesi Almatyda sút jáne jemis-jıdek ónimderinde 40 paıyzǵa jýyq, ette 30 paıyzdy quraıdy
ALMATY. 20 sáýir. QazAqparat - Almaty qalasy qazir Qazaqstandaǵy azyq-túlik ónimderiniń eń úlken tutynýshysy.
Bul týraly búgin Almatyda qala mańyndaǵy azyq-túlik beldeýin damytý máseleleri boıynsha ótkizilgen alqaly jıyn barysynda aıtyldy.
«Sońǵy málimetter boıynsha, Almaty qalasynyń azyq-túlik naryǵy 2,8 mlrd. AQSh dollaryna baǵalanýda. Almatylyqtar jyl saıyn 215 myń tonnadan astam et ónimderin, 200 myń tonna un, 210 myń tonna sút, 600 myń tonnadaı kókónis tutynady. Suranys úzdiksiz ósip kele jatyr. Bul qala turǵyndarynyń kóptigi, onyń satyp alý múmkindigi jáne munda birqatar iri jáne orta óńdeý kásiporyndarynyń ornalasýyna baılanysty. 2012 jyly qalanyń tamaq ónerkásibi 146 mlrd. teńgeniń ónimin óndirdi. Ondaǵy ósim aldyńǵy jylmen salystyrǵanda 2,5 paıyzdy qurady», - deıdi qala ákiminiń orynbasary Erbol Shormanov. Onyń aıtýynsha, shaharda tamaq óndirisi ónimderi kóleminiń ósý úrdisi saqtalýda. Bul kásiporyndardyń suranysy sútte 203 tonna, ette 40 tonna, maıly daqyldarda 220 myń tonna. Keden odaǵy qurylǵannan keıin qalada Reseı men Belorýs eliniń azyq-túlik ónimderi kóbeıdi. Sondaı-aq munda Qytaı, Qyrǵyzstan jáne Ózbekstan elderi de óz ónimderin jetkizedi.
Erbol Shormanovtyń aıtýynsha, «sarapshylardyń baǵalaýynsha, Almatyda ımporttyq ónimderdiń úlesi sút jáne jemis-jıdek ónimderinde 40 paıyzǵa jýyq, ette - 30 paıyzdy quraıdy. Qala jetkilikti deńgeıde ımporttyq ónimderge táýeldi bolǵandyqtan bul ınflıatsııa úderisinde táýekeldi ulǵaıtýda. Qazirgi tańda qalanyń tutyný suranysy halyq pen kásiporyndarda da negizinen ońtústik jáne soltústik óńirlerden jetkizilgen azyq-túlik esebinen jabylady. Almaty oblysy suranystyń jartysynan azyn ǵana jabýda. Almaty oblysynda óndirilgen azyq-túlik ónimderiniń ósimi baıqalǵanmen, ázirge ol aıtarlyqtaı deńgeıde emes».
