Importty yǵystyrý: Reseıden bolat tasymaldaý toqtaýy múmkin
ASTANA. QazAqparat - Mashına jasaýdy damytýdyń 2019-2030 jyldarǵa arnalǵan baǵdarlama jobasynda zaýyttardy otandyq tehnıkalyq quryshpen qamtamasyz etý qadamdary qamtyldy. Bul týraly búgin Úkimet úıinde ótken brıfıngte málim boldy, dep habarlaıdy QazAqparat.
«Mashına jasaý salasy metallýrgııalyq ónimdi basty tutynýshylardyń biri bolyp sanalady. Búginde bolattyń erekshe túrlerin negizinen Reseıden ımporttaımyz. Ótken jyly Qazaqstan mashına jasaýshylarynyń forýmynda osy máseleni kótergen bolatynbyz, ıaǵnı biz úshin bul baǵyt óte ózekti. Jylyna ustahanalarǵa, mashına qurylysyna beriktigi joǵary kem degende 100 myń tonna bolatty óndirýimiz kerek, sebebi osynyń barlyǵy ımport. Mashına jasaý salasyn damytýdyń qarqynyn eskersek, taıaý jyldary bul máseleniń ózektiligi arta túsedi», - dedi Májilis depýtaty, Qazaqstan mashına jasaýshylar odaǵynyń tóraǵasy Meıram Pshembaev.
Óz kezeginde QR Investıtsııalar jáne damý vıtse-mınıstri Roman Sklıar mashına jasaý salasyn damytýdyń 2019-2030 jyldarǵa arnalǵan baǵdarlama jobasynda memleket tarapynan qoldaýdyń ınstıtýtsıonaldy sharalarynan bólek, mashına qurylysyna qajetti quryshty óndirý qadamdary eskerilip otyrǵandyǵyn atap ótti.
«Importty yǵystyrýǵa arnalǵan baǵdarlama salanyń barlyq baǵyttaryn qamtýy tıis. Sondyqtan otandyq kásiporyndardy shıkizatpen tolyqtaı qamtamasyz etý - talqylanyp jatqan osy baǵdarlamanyń negizgi basymdyqtarynyń biri», - dep túıdi R. Sklıar.
Aıta keteıik, 20-21 qyrkúıek kúnderi Astanadaǵy EXPO-qalashyǵy aýmaǵynda dástúrli Qazaqstan mashına jasaýshylarynyń dástúrli VI Forýmy ótedi. Belgili bolǵandaı, forým qorytyndysy boıynsha 2019-2030 jyldarǵa arnalǵan Qazaqstan mashına jasaý salasyn damytýdyń keshendi josparynyń jobasy usynylady.
