Importty almastyryp otyrǵan sańyraýqulaqtar OQO-da ósiriledi
ASTANA. QazAqparat - Ońtústik Qazaqstan oblysynyń ákimi Janseıit Túımebaev Saıram aýdanyndaǵy sańyraýqulaqtyń qozyquıryq túrin ósiretin «AgroGreen» JShS-niń jumysymen tanysty. Jylyna 200 tonna qozyquıryq óndirýge qaýqarly kásiporyn jylyjaı túrinde jasaqtalǵan. Mundaǵy qural-jabdyqtar Polsha men Gollandııa elderinen satyp alynǵan. Osy jyly iske qosylǵan kásiporynda 11 adam turaqty jumyspen qamtylyp otyr, dep habarlaıdy QazAqparat óńir basshysynyń baspasóz qyzmetine silteme jasap.
Oblysta qozyquıryq ósirýde eń alǵashqy iri joba bolyp tabylatyn sharýashylyqtyń jumysymen tanysqan aımaq basshysy kásipkerdiń jumysyna rızashylyǵyn bildirdi.
«Búgingi kúnge atalǵan ónim túri shetelden (Polshadan) Qazaqstanǵa jylyna 280 tonna kóleminde ımporttalýda. «Agro Greens» JShS tolyq qýattylyqqa shyqqan jaǵdaıda elimizdiń ishki naryǵyn tolyq qamtamasyz etip, artylǵan ónimin shetelge eksporttaýǵa múmkinshiligi bar. Búgingi tańda jobany tolyq qýattylyqqa shyǵarý úshin aınalym qarajatqa 30 mln teńge kóleminde «Ońtústik» AIO arqyly nesıelik qarjy bólinip otyr», - dedi ákim.
Budan bólek, J.Túımebaev atalǵan joba otandyq «noý-haý» saýda-sattyq taýary bola alatynyn jáne onyń erekshe tehnologııamen júzege asyrylyp otyrǵanyn atap ótti.
Seriktestik ósirgen ónimin Qaraǵandy, Almaty, Shymkent qalalaryna ótkizýde. Kásiporyn basshysy Ferýza Karımovanyń aıtýynsha, jobaǵa bas-aıaǵy 572 mln 500 myń teńge jumsalypty.
Qozyquıryqtyń A15 sortyn ósirip shyǵaratyn ferma tuqymdy Gollandııa elinen ákeledi. Fermada kólemi 280 sharshy metr bolatyn 12 kamera bar. Munda egilgen qozyquıryq úsh aıda daıyn bolady. ıAǵnı, sharýalar jylyna 4 ret ónim egip ala alady.
Munan soń oblys ákimi Aqsýkent aýylynda ornalasqan «Birlik -4» JShS-de júrgizilip jatqan qurylys jumystarynyń barasymen tanysty. Jalpy aýmaǵy 5 gektardy quraıtyn jobanyń jalpy quny 2016,7 mln teńge. Onyń 350 mln teńgesin kásipker «Bıznestiń jol kartasy - 2020» baǵdarlamasy aıasynda alǵan. Kásiporyn 2018 jyldyń shilde aıynda iske qosylady dep kútilýde. Joba qýattylyǵy 1,2 mln banka kókónis konservileý jáne 40 myń tonna kókónis saqtaýǵa múmkindik beredi. Kásiporyn tolyq iske qosylǵanda 200 adam turaqty jumyspen qamtylmaq.
Qazir munda konservileý tsehynyń qurylysy aıaqtalyp, qural-jabdyqtarǵa tapsyrys berilip qoıǵan. Sondaı-aq kókónis saqtaıtyn 8 dana qoıma qurylysyn salý josparlanyp otyr. Búgingi tańda sıymdylyǵy 5 myń tonnalyq 1 qoıma iske qosylǵan. Basqa qoımalardyń qurylysy aıaqtalý satysynda. Barlyq qoımalardyń jalpy sıymdylyǵy 40 myń tonnany quraıdy.
Jumystyń barysymen qanyqqan oblys ákimi agrarly aımaq úshin mundaı qoımalardyń asa qajet ekenin atap ótti.
