Importtyń tómendeýinen Ózbekstandaǵy gaz quıý stantsııalarynyń jumysyna shekteý engizildi

TAShKENT. KAZINFORM – Importtalatyn kógildir otyn kóleminiń tómendeýine baılanysty Ózbekstandaǵy gaz quıý stantsııalarynyń jumysyna shekteýler engizilip jatyr, dep habarlaıdy Kazinform agenttiginiń menshikti tilshisi.

«Hýdýdgaztamınot» aktsıonerlik qoǵamynyń málimetine saı, shekteýler jergilikti ákimdiktermen kelise otyryp engizildi. Jańa keste boıynsha Tashkenttegi 78 gaz quıý stantsııasy saǵat 06:00-23:00 aralyǵynda jumys isteıdi. Al oblystardaǵy beketter tańǵy 05:00-den keshki 17:00-ge deıin qyzmet kórsetedi.

Energetıka mınıstrliginen málim etkendeı, bul sharalar kórshiles eldiń gaz tasymaldaý qubyrynda bolǵan tehnıkalyq aqaýǵa baılanysty qabyldanyp otyr.

- Bul shekteýler ýaqytsha engizildi. Qazirgi ýaqytta gaz qysymyn qalpyna keltirý boıynsha jumys júrgizilip jatyr, - delingen vedomstvonyń habarlamasynda.

Keıin Zań shyǵarý palatasynyń otyrysynda sóz sóılegen Energetıka mınıstri Jýrabek Mırzamahmýdov kórshiles eldiń kógildir otyn tasymaldaý júıesinde bolǵan aqaýdan respýblıkada 6 mln tekshe metr gaz tapshylyǵy bolǵanyn málim etti.

Buǵan deıin habarlaǵanymyzdaı, Ózbekstanda gaz óndirisi tómendep barady. Jyl basynan beri kórshiles elde 35,5 mlrd tekshe metr gaz óndirildi, bul ótken jyldyń sáıkes kezeńimen salystyrǵanda 5,3%-ǵa az. Sondaı-aq, janarmaı óndirisi 14%-ǵa tómendegen edi.

Qosa ketsek, taıaýda Tashkent oblysynyń ustazdarymen kezdesken Ózbekstan prezıdenti Shavkat Mırzıeev Ústirt óńirinde 6500 metr tereńdikte ornalasqan iri gaz ken orny tabylǵanyn málim etti.