Importtyq taýarlarǵa «Qazaqstanda jasalǵan» degen sertıfıkattar berilgen – depýtat
ASTANA. KAZINFORM – Májilistiń jalpy otyrysynda otandyq taýar óndirýshilerdi qoldaý maqsatynda biryńǵaı tizilim qurý týraly zań jobasy birinshi oqylymda qaralyp jatyr.
— «ST-KZ» jáne ındýstrııalyq sertıfıkattar bastapqyda otandyq óndirýshilerdi naqty qoldaý úshin quryldy. Onyń negizinde memlekettik satyp alýǵa qatysý kezinde preferentsııalar beriledi, jeńildikter men sýbsıdııalar alýǵa múmkindik jasalady. Alaıda, is júzinde kórsetip otyrǵandaı, qazir sertıfıkattaý júıesi onyń senimdiligine nuqsan keltiretin eleýli buzýshylyqtar men kemshilikterge tap bolyp otyr. Jalǵan óndiristerdi tirkeý jaǵdaılary kezdesedi. Mysaly, Atyraýda «Isataı men Mahambet» eskertkishiniń ornalasqan jerine óndiris bar dep sertıfıkat berilgen. Taldyqorǵanda sertıfıkat alǵan sýbsent óndiris ornynyń mekenjaıy retinde monsha kesheni kórsetilgen, — dedi Májilis depýtaty Nurtaı Sabılıanov otandyq taýar óndirýshilerdiń tizilimin retteý týraly zań jobasyn talqylaý barysynda.
Onyń aıtýynsha, derekterdi asyra silteý jáne burmalaý jaıttary bar.
— Importtyq taýarlarǵa, ıaǵnı lateks qolǵaptary, LG teledıdary, jasandy kógaldandyrý men basqa da taýarlarǵa Qazaqstanda jasalǵan degen sertıfıkattar berilgen. Óndiris ornyna qoıylatyn qarapaıym talaptar men ónim sapasynyń standarttaryn saqtamaý jaǵdaılary da kezdesedi. Mysaly, Almatyda sút ónimderi sanıtarııalyq talaptarǵa saı kelmeıtin turǵyn úıde óndirilip kelgen, — deıdi ol.
Halyq qalaýlysy keltirgen málimetke súıensek, 2023 jyly Bas prokýratýra 206 buzýshylyqty anyqtady. Sonymen qatar ýákiletti organ júrgizgen 42 tekserýdiń qorytyndysy boıynsha 40-tan astam ákimshilik is qozǵaldy.
— Bul problemalar ekonomıkamyzǵa keri áserin tıgizýde. Saldarynan kásipkerler básekelestik múmkindiginen aıyrylady. Memlekettik bıýdjet jalǵan óndiristerdi qoldaı otyryp, shyǵynǵa ushyraıdy. Bıýdjetimiz ózgelerdiń ekonomıkasyna jumys isteıdi. Eń bastysy — búkil memlekettik qoldaý júıesine degen senim azaıady. Búgin qaralyp otyrǵan zań jobasynda Qazaqstandyq taýar óndirýshilerdiń tolyqqandy tizilimin qurý usynylady. Bul memlekettik organdar úshin qoljetimdi, ortalyqtandyrylǵan aqparattyq júıe bolady. Júıe sertıfıkattaý protsesiniń ashyqtyǵy men senimdiligin qamtamasyz etedi, sonymen qatar ol yńǵaıly jáne tegin bolmaq, — dep N. Sabılıanov jańa zań jobasyn maquldaýdy surap otyr.
Osylaısha qazaqstandyq taýar óndirýshilerdiń tizilimi qoldanystaǵy 6 tizilimdi biriktiredi.
Buǵan deıin habarlanǵandaı, otandyq taýar óndirýshilerdiń tizilimi jasalady.