Importtyq dárini otandyq preparattarmen almastyrýda ilgerileý bar ma
ASTANA. KAZINFORM – QR Densaýlyq saqtaý mınıstrligi otandyq dári-dármek naryǵyna qatysty túsinik berdi.
Ulttyq statıstıka bıýrosynyń derekterine sáıkes, 2025 jyldyń qorytyndysy boıynsha Qazaqstan Respýblıkasynda farmatsevtıkalyq ónimderdi óndirý kólemi 191,1 mlrd teńge boldy (2024 jylǵy deńgeıden 8,7%-ǵa joǵary). Jalpy, sońǵy úsh jylda qazaqstandyq farmatsevtıka ónerkásibi oń serpin kórsetip otyr.
- Keıingi jyldary farmatsevtıka jáne medıtsına ónerkásibindegi ınvestıtsııalyq belsendiliktiń de artqany baıqaldy. 2025 jyly ınvestıtsııa kólemi 1,6 esege ósip, 142,8 mln AQSh dollaryn qurady (2024 jyly – 91,3 mln AQSh dollary). 2025 jylǵy eksport kólemi 1,2 esege artyp, 39,9 mlrd teńge boldy (2024 jyly – 32,8 mlrd teńge, 2023 jyly – 23 mlrd teńge). Qazaqstandyq farmatsevtıkalyq óndirýshiler týraly aqparat Densaýlyq saqtaý mınıstrliginiń jáne «SQ-Farmatsııanyń» saıttarynda jarııalanady. Búginde qazaqstandyq óndirýshilerdi qoldaý boıynsha keshendi sharalar iske asyrylyp jatyr. Sonyń ishinde «SQ-Farmatsııa» satyp alýdy júrgizý kezinde Dárilik zattar men medıtsınalyq buıymdardy satyp alý qaǵıdalaryna sáıkes otandyq óndirýshilerdi qoldaýdy basty mindetteriniń biri retinde qarastyrady, - delingen mınıstrliktiń Kazinform agenttigine bergen jaýabynda.
Densaýlyq saqtaý mınıstrligi dárilik zattardyń tsıkliniń barlyq kezeńinde: ázirleý men óndirýden bastap, tirkeýge, tirkeýden keıingi monıtorıng, kóterme-bólshek saýdada ótkizýge deıin keshendi sapa baqylaýyn júzege asyrady. Qazir Qazaqstanda 6859 dárilik zat tirkelgen, onyń 1066-sy qazaqstandyq ónim.
- Emdelýshilerdiń qaýipsizdigin jáne dárilik zattardyń sapasyn qamtamasyz etý maqsatynda naryqta turaqty qadaǵalaý júrgiziledi. Ol mynalardy qamtıdy: farmakologııalyq qadaǵalaý, tasymaldaý kezinde dárilik zattardyń árbir partııasynyń qaýipsizdigin baǵalaý. Barlyq qazaqstandyq kompanııalardyń tıisti óndiristik (GMP) sáıkestik sertıfıkaty bar, bul otandyq óndiris alańdarynyń halyqaralyq sapa standarttaryna sáıkestigin rastaıdy. Qazaqstannyń retteýshi júıesiniń qarqyndy damýyn Dúnıejúzilik densaýlyq saqtaý uıymynyń (DDU) sarapshylary rastady. 2026 jylǵy aqpanda Qazaqstan TMD elderi arasynda birinshi jáne DDU Eýropalyq óńirinde ulttyq retteýshi júıeniń 3-shi deńgeıine (maturity level 3) qol jetkizgen tórtinshi retteýshi boldy. Bul nátıjege jetý úshin 8 jyl qajet boldy: 2018 jylǵy 1-shi deńgeıden bıylǵy 3-shi deńgeıge deıin, - dep atalyp ótken mınıstrlik aqparatynda.
Budan bólek, aldaǵy jyldary quny 316 mlrd teńge bolatyn ınvestıtsııalar týraly qol qoıylǵan 6 kelisim (Khan Tengri, Nobel, Altınfarm, Romfarm, Abdı Ibragım Global Farm, Hımfarm) esebinen otandyq dárilik zattardyń úlesi artady. Bul kelisimder qosymsha 400-ge jýyq dárilik zattardyń ataýyn óndirýdi jáne 1100-den astam turaqty jumys ornyn ashýdy kózdeıdi.
Buǵan deıin qazaqstandyqtar qandaı preparattardy jıi satyp alatynyn jazǵan edik.