Importtyq azyq-túlikti otandyq ónimge almastyrý máselesi qashan sheshiledi
ASTANA. KAZINFORM – 19 azyq-túlik taýarynyń ishinde beseýi boıynsha ımportqa táýeldilik bar. Bul týraly Parlament Májilisinde sút fermalary taqyrybyn talqylaýǵa arnalǵan jıynda QR Aýyl sharýashylyǵy vıtse-mınıstri Amanǵalı Berdalın málim etti.
«Bıyl jańartylǵan jol kartasy aıasynda 415,6 mlrd teńge somasyna 311 jobany júzege asyrý josparlanǵan. Qazir atalǵan pýlda 145,3 mlrd teńgege 178 joba paıdalanýǵa berildi. Bul rette, 19 azyq-túlik taýarynyń ishinde beseýi boıynsha ımportqa táýeldilik baıqalyp otyr. Qus etine qatysty 2026 jylǵa deıin jalpy qýaty jylyna 365 myń tonna bolatyn 388,8 mlrd teńge somasyna 31 jobany iske asyrý josparlanǵan. Bul óz kezeginde 90 paıyzǵa deıin qamtamasyz etýge múmkindik beredi», - dedi A. Berdalın.
Onyń aıtýynsha, shujyq ónimderi boıynsha 2026 jylǵa deıin jalpy qýaty jylyna 7,8 myń tonnaǵa deıin 9 mlrd teńgege úsh joba aıaqtalady. Osy qadamdar 74 paıyzǵa deıin qamtamasyz etýge jaǵdaı jasaıdy.
«Іrimshik ári súzbege toqtalsaq, 2026 jylǵa deıin jyldyq qýaty 337,4 myń tonna bolatyn 300,2 mlrd teńge somasyna 124 taýarlyq sút fermasy iske qosylady. Bul turǵyda 72 paıyzǵa deıin qamtamasyz etýge múmkindik beredi. Al qant óndirý baǵytyna toqtalsaq, osy salany damytýdyń 2026 jylǵa deıingi keshendi jospary aıasynda jalpy qýaty 150 myń tonna daıyn ónim boıynsha jańa qant zaýytyn salý, sondaı-aq jumys istep turǵan zaýattardy jańǵyrtý josparlanǵan. Otandyq shıkizatta qaıta óńdeý esebinen qant ónimine qatysty 93 paıyzǵa deıin qamtamasyz etýge múmkindik bolady», - dedi vıtse-mınıstr.
Aıta keteıik, jaqynda Aýyl sharýashylyǵy mınıstri Aıdarbek Saparov aýyl sharýashylyǵy qyzmetkerleriniń birinshi forýmynda eldiń qant qyzylshasyna degen suranysy tolyqtaı otandyq ónimmen qamtamasyz etilgenin aıtty.
Sonymen qatar, Pavlodar oblysynda 14 mıllıard teńgege taýarly-sút ferma salynyp jatyr.
Bıyl maýsym aıynda Aýyl sharýashylyǵy mınıstri Aıdarbek Saparov keıingi bir jylda sút ónimderiniń ımporty artqanyn aıtty.
