Importtalǵan mal basy arqyly taýarlyq iri qaranyń genetıkasy jaqsartylady - «QazAgro» holdıngi
ASTANA. 19 qańtar. QazAqparat /Rýslan Ǵabbasov/ - 5 jyldyń ishinde 72 myń bas asyl tuqymdy mal satyp alynady. Bul týraly búgin Úkimette Qazaqstandaǵy iri qara mal etiniń eksporttyq áleýetin damytý jobasyna arnalǵan keńesten keıingi brıfıngte «QazAgro» ulttyq basqarýshy holdıngi» AQ Basqarma tóraǵasy Asyljan Mamytbekov málim etti.
A. Mamytbekov elimizdegi iri qara mal etiniń eksporttyq áleýetin damytý jobasyn iske asyrý bastalatynyn aıta kele, «jobany qarjylandyrý talabynyń jyldyq kórsetkishi 6 paıyzdy quraıdy jáne ol 7 jylǵa deıin eskerilgen. Atap aıtqanda, analyq iri qara mal basy satyp alynady jáne jeńildetilgen talaptarmen olar fermerlik sharýashylyqtarǵa lızıngpen beriledi»,-dedi.
Onyń paıymdaýynsha, bul sharalar óz kezeginde fermerlerge bir mezgilde analyq mal basyn kóbeıtýge múmkindik beredi.
«QazAgro» holdıngi basshysynyń sózine qaraǵanda, joba aıasynda fermelerdiń jaıylymdaryna, tájirıbesine tyńǵylyqty kóńil bólinbek.
«Asyl tuqymdy iri qara budan buryn josparlanǵan kólemde, ıaǵnı 72 myń bas kóleminde satyp alynatyn bolady. Sonymen qatar eldegi jergilikti asyl tuqymdy iri qaranyń da áleýetine nazar barynsha aýdarylady. Alaıda, bul mal basy jetkiliksiz»,-dedi A. Mamytbekov.
Onyń aıtýynsha, syrttan ákelinetin mal basy bul jobadaǵy shamaly ǵana quramdas bólikti alyp jatyr. «Jobanyń negizgi bóligi taýarlyq mal sanyn arttyrýǵa baǵyttalyp otyr. Sebebi, syrttan jetkizilgen asyl tuqymdy iri qara birden etke jiberilmeıdi ǵoı. Atap aıtqanda, bul ımporttalǵan mal basy arqyly taýarlyq iri qaranyń genetıkasy jaqsartylady»,-dedi «QazAgro» holdınginiń basshysy
