Importtalatyn dáriler qaı kezde QQS-dan bosatylady
ASTANA. KAZINFORM – 2026 jylǵy 1 qańtardan bastap Qazaqstanda birqatar dárilik zattardy ımporttaý kezinde qosylǵan qun salyǵynan (QQS) bosatý tártibi qoldanysqa engizildi. Bul týraly QR Qarjy mınıstrligi Memlekettik kirister komıteti málim etti.
Komıtettiń túsindirýinshe, buǵan deıin dárilerdi memlekettik satyp alý rásimderi kóbine ónim elge ákelingennen keıin júrgiziletin. Sonyń saldarynan ımporttaýshylar kepildendirilgen tegin medıtsınalyq kómek kólemi jáne mindetti áleýmettik medıtsınalyq saqtandyrý aıasynda jetkiziletin preparattarǵa QQS boıynsha jeńildikti kedendik resimdeý kezeńinde paıdalana almaǵan.
2026 jyldan bastap KTMKK jáne MÁMS sheńberinde, sondaı-aq orfandyq jáne áleýmettik máni bar aýrýlardy emdeýge arnalǵan dárilerdi ımporttaý QQS-dan bosatylady. Mundaı preparattardyń tizbesi men jeńildikti qoldaný tártibi 2025 jylǵy 31 jeltoqsandaǵy №1203 Úkimet qaýlysymen bekitilgen.
- QQS-dan bosatýdyń negizgi sharty – KTMKK jáne MÁMS sheńberinde dárilik zattardy jetkizý týraly sharttyń bolýy. Bul qujat Densaýlyq saqtaý mınıstriniń 2023 jylǵy 7 maýsymdaǵy №110 buıryǵyna sáıkes rásimdelýi tıis. Tek osyndaı shart dárilerdiń memlekettik medıtsınalyq baǵdarlamalar aıasynda jetkiziletinin rastaıdy.
Eger ımport kezinde mundaı shart bolmasa, QQS tólenedi. Bul rette mólsherleme preparattyń arnaıy tizbege engizilýine baılanysty aıqyndalady, - delingen komıtet dereginde.
Eger dári áleýmettik qorǵaý týraly zańnamada kózdelgen arnaıy tizbege engizilgen bolsa, ımport kezindegi QQS mólsherlemesi 5 paıyzdy quraıdy. Al tizbege kirmeıtin preparattarǵa standartty 16 paıyzdyq mólsherleme qoldanylady.
Komıtet ókilderi ımporttaýshylarǵa qujattardy aldyn ala durys rásimdeýdiń mańyzyn eskertti, óıtkeni salyqtyq jeńildikti qoldaný múmkindigi osy talaptarǵa tikeleı baılanysty.
Aıta keteıik, elde 400-den astam jańa dári-dármek óndiriledi.