Import ósti: et pen sút ónimderinen jylda 800 mln dollar joǵaltamyz
ASTANA. KAZINFORM – Aýyl sharýashylyǵynda daıyn ónimniń ımporty ósip keledi. Bul týraly Parlament Májilisinde mal sharýashylyǵy ónimderin tereń óńdeý taqyrybyna arnalǵan Úkimet saǵatynda depýtat Serik Egizbaev aıtty.
«Mal sharýashylyǵy ónimderin óndirý serpini turaqty damýdy kórsetip jatyr jáne ósý úrdisine ıe. Sonymen qatar, tereń óńdeýdiń úlesi áli de tómen. Qaıta óńdeý jáne tamaq ónerkásibiniń úlesi elimizdiń barlyq ónerkásibi ónimderin óndirýdiń jalpy kóleminiń nebári 6 paıyzyn qurady.
Atap aıtqanda, 2023 jyly sút óńdeý úlesi 33 paıyzdy, et óńdeý – 41%, jún óńdeý – 19%, iri qara mal terisin óńdeý úlesi 6 paıyzdy ǵana qurady», - dedi S. Egizbaev.
Onyń aıtýynsha, daıyn ónimniń ımporty ósip keledi. 2023 jyly sút ónimderi boıynsha ósim 400 mln AQSh dollaryn quraıtyn 20 paıyzdan asty, al et pen et ónimderiniń ımporty 408 mln AQSh dollaryn qurady.
«Osylaısha, tek et pen sút ónimderi boıynsha qaıta óńdeýdiń nashar júrgizilýiniń saldarynan biz jyl saıyn 800 mln AQSh dollaryn joǵaltyp, olar sheteldik fermerlerdi qarjylandyrýǵa ketip jatyr. Bizdiń oıymyzsha, qalyptasqan jaǵdaıdyń negizgi sebepteri burmalanǵan statıstıka saldarynan bolyp otyr. Sarapshylardyń pikirinshe, kórsetkishterdi asyryp kórsetý tek qana sút boıynsha 2 mln tonnany, iri qara maldyń sany boıynsha 1 mln basty quraıdy. Bul osy ýaqytqa deıin mal basyn esepke alýdyń naqty jáne ashyq júıesiniń durys jolǵa qoıylmaýynyń saldarynan dep esepteımiz. Osy salany retke keltirip, zamanaýı tsıfrlyq tehnologııalardy qoldana otyryp, mal basy men óndiriletin mal sharýashylyǵy ónimderi boıynsha statıstıkalyq kórsetkishterdi qalyptastyrýdyń biryńǵaı júıesin engizetin kez keldi» - dedi depýtat.
