Import dári-dármekke táýeldi ekenimizdi moıyndaýymyz qajet – Aqmaral Álnazarova

ASTANA. KAZINFORM – Elimiz dárilik zattardyń 70 paıyzdan astamyn ımporttan alyp otyr. Bul týraly Májilistiń jalpy otyrysynda Densaýlyq saqtaý mınıstri Aqmaral Álnazarova aıtty.

«Dári-dármekke kelgende ımportqa táýeldi ekenimizdi moıyndaýymyz qajet. Búginde dárilik zattardyń 70 paıyzdan astamy ımporttalyp otyr. Prezıdenttiń 2029 jylǵa deıin otandyq óndiristiń kólemin 50 paıyzǵa jetkizý tapsyrmasy túrli sebepterge baılanysty tejelýde. 2023 jyly eksportqa shyǵarylǵan Qazaqstan taýarynyń kólemi 17 mln dollardy quraıdy. Negizinen Pákistan, Reseıge shyǵarylyp jatyr. Onyń 90 paıyzy medıtsınalyq quraldar men kúndelikti medıtsınalyq maqsatta qoldanylatyn buıymdar quraıdy», - dedi Aqmaral Álnazarova.

Mınıstrdiń dereginshe, 2023 jyldyń qorytyndysynda elimizge 1,7 mlrd dollardyń dári-dármegi ımporttaldy.

«Biryńǵaı dıstrıbıýtor tarapynan satyp alynatyn dári-dármek kóleminde birinshi orynda Qazaqstan tur. Ataýymen sanaǵanda 60 paıyzǵa deıin otandyq óndirýshilerden alynatyn dári-dármekti quraıdy. Ekinshi orynda 8 paıyzdyq úlespen Germanııa, úshinshi orynda Úndistan tur», - dedi mınıstr.

Buǵan deıin Májilis «Zııatkerlik menshik quqyqtarynyń saýda aspektileri jónindegi kelisimge tolyqtyrý engizý týraly hattamany ratıfıkatsııalaý týraly» Zańdy qabyldaǵanyn jazǵan edik.