Immýnolog mamannan keńes: Kez kelgen dárýmendi isher aldynda dárigermen keńesý kerek
NUR-SULTAN. QazAqparat – Allergolog-ımmýnolog, pedıatr dáriger, Astana medıtsına ýnıversıtetiniń mıkrobıologııa, vırýsologııa jáne ımmýnologııa kafedrasynyń assıstenti Móldir Baqtybaeva ımmýnıtetti kóterýdiń birneshe ádisin aıtyp berdi, dep habarlaıdy QazAqparat tilshisi.
«S vıtamınin adam aýyrǵannan bastap ishý kerek. Aldyn ala ishýdiń qajeti joq. Bul dárýmendi adam aýyrǵandaǵy alǵashqy klınıkalyq belgiler baıqalǵannan bastap jazylǵanǵa deıin ishedi. Qandaı da bir belsendi zatty, mıneraldy vıtamındi isher kezde aldyn ala tekserip alý kerek. Eger adam tolyq tamaqtanyp, kúndelikti qajetti mıkro jáne makro elementter men kalorııany tutynatyn bolsa, ondaı adamdarǵa eshqandaı vıtamınniń keregi joq. Óıtkeni vıtamınniń, belsendi zattyń ózi de aǵzada saqtalady. Qandaı da bir dárýmendi isher aldynda dárigerden keńes alý qajet», - deıdi ımmýnolog-dáriger «Habar 24» arnasyndaǵy «Dıagnoz» baǵdarlamasynda.
Móldir Baqtybaeva sonymen qatar antıbıotıktar týraly pikir bildirdi.
Mamannyń aıtýynsha, tumaý kezinde antıbakterıaldy terapııany qabyldaýǵa bolmaıdy. Nege deseńiz, ol ımmýndyq júıeni álsiretedi.
«Vırýsty – vırýsqa qarsy dárilermen emdeý kerek. Baıqap otyrsaq, vırýsqa qarsy dárilerdiń ózi de alǵashqy bir eki kúnde óziniń áserin bere bastaıdy. Al endi aýyrmaımyn dep, aldyn ala ımmýnıtetti kúsheıtetin, vırýsqa qarsy dárilerdi qabyldaýǵa bolmaıdy», - deıdi ol.
Immýnolog-dáriger dene qyzýy 38,4 deıin bolsa sý iship, dene qyzýyn túsirýge tyrysý kerektigin aıtady.
«Árıne, eger de nevrologııalyq aýrýlar bolsa, dene qyzýynyń 38,4-ge deıin jetýin kútip otyrmaýymyz kerek. Deneniń ózi qyzýdy jeńe almasa dárigerge júginip, analızden ótý kerek. Sebebi qyzýmen júre berseńiz oǵan qosalqy bakterıaldyq ınfektsııa qosylýy múmkin. Qosymsha ınfektsııa qosylǵan kezde ǵana biz antıbıotık taǵaıyndaımyz», - deıdi ol.
Dáriger maman «aýyryp em izdegenshe, aýyrmaýdyń jolyn izde» degen qazaqtyń támsilin eske saldy.
«Eń birinshiden durys tamaqtaný kerek. ıAǵnı tolyqqandy vıtamınmen, aqýyzben, kómirsýmen baıytylǵan tamaqty tutynǵan abzal. Odan keıin uıqynyń tolyqqandy ári durys bolǵany jón. 8 saǵattyq uıqy bolýy kerek. Úshinshi sportpen shuǵyldanyp, jattyǵý jasaǵan paıdaly. Tórtinshiden, bizdiń ózimizdiń denemiz 80 paıyz sýdan turatyndyqtan aǵzany qurǵatpaı, kúndelikti keshki altyǵa deıin az mólshermen jyly sý iship júrý kerek», - dedi ol.
