Immýndaý aptalyǵy: vaktsınalar jyl saıyn 4 mln astam adamnyń ómirin saqtaıdy

ALMATY. KAZINFORM — 24-30 sáýir aralyǵynda álemde jyl saıyn ımmýndaý aptalyǵy ótedi. Bul is-shara barlyq kontınentterdegi 180-nen astam el qatysatyn álemdik jobaǵa aınaldy. Osy jyldyń ımmýndaý aptalyǵynyń urany «Bárimiz uzaq ómir súreıik». QR Densaýlyq saqtaý mınıstrliginiń shtattan tys bas allergolog-ımmýnology Araı Batyrbaeva vaktsınatsııanyń mańyzdylyǵy týraly aıtty.

Kardıologııa jáne ishki aýrýlar ǵylymı-zertteý ınstıtýtynyń respýblıkalyq allergologııa ortalyǵynyń basshysy Araı Batyrbaevanyń aıtýynsha, vaktsınatsııa — adam aýrý qozdyrǵyshtarymen baılanysqa túskenge deıin aýrýdan qorǵaýdyń qarapaıym, qaýipsiz jáne tıimdi ádisi. 

Ol birqatar juqpaly aýrýǵa tózimdilikti qalyptastyrý úshin organızmniń tabıǵı qorǵanys mehanızmderin qoldanady jáne ımmýndyq júıeni kúsheıtedi.

«Qazirgi zamanda juqpaly aýrýlar shekaradan ońaı ótip, ımmýnıteti joq kez kelgen adamǵa juǵýy yqtımal. Vaktsınatsııa ózińdi jáne aınalańdaǵylardy qorǵaýǵa múmkindik beredi. Kez kelgen adam ekpe saldyra alady. Biraq belgili bir aýrýlary bar adamdarǵa keıbir ekpelerdi salýǵa bolmaıdy nemese keıinirek saldyrýyna bolady. Ol birqatar aýrýdan qorǵaıdy, sonyń ishinde: jatyr moıny obyry, V gepatıti, tumaý, qyzylsha, menıngıt, kókjótel, pnevmonııa, polıomıelıt, qutyrý, jelsheshek jáne taǵy basqalary. DDU baǵalaýy boıynsha, tek balalarǵa arnalǵan vaktsınalar jyl saıyn 4 mıllıonnan astam adamnyń ómirin saqtaıdy», — dedi ımmýnolog.

Dárigerdiń sózinshe, vaktsınatsııa qaýipsiz jáne ádette qoldyń aýyrýy, ınektsııa ornyndaǵy qyzarý jáne tómen temperatýra sııaqty jeńil janama áserlerdi týdyrady. Aýyr janama óte sırek kezdesedi.