Imıdjdik is-sharalarǵa bıýdjetten qansha qarjy bólinedi – vıtse-mınıstr jaýaby

ASTANA. KAZINFORM – Ulttyq ekonomıka mınıstriniń orynbasary Arman Qasenov elimizde ótetin túrli respýblıkalyq jáne halyqaralyq forýmdar, konferentsııa taǵy sol sııaqty is-sharalardyń paıdasy baryn aıtty.

Имидждік іс-шараларға бюджеттен қанша қаржы бөлінеді – вице-министр жауабы
Фото: Ағыбай Аяпбергенов / Kazinform

— Respýblıkalyq bıýdjettiń jalpy shyǵynynyń ishindegi ımıdjdik is-sharalardyń úlesi bar bolǵany 0,01%. Jalpy, ımıdjdik is-sharalardyń mańyzy zor, onyń ishinde ınvestıtsııalyq forýmdar da bar. Bul qazaqstandyq emes, álemdik tájirıbe. Bul praktıka elge kapıtal men ınvestıtsııa tartýǵa, eksport áleýetine yqpal etýge baǵyttalǵan. Sondyqtan ımıdjdik is-sharalardy belgili bir deńgeıde aqtaıdy dep oılaımyz, — dedi Arman Qasenov Úkimet otyrysynan keıin ótken baspasóz máslıhatynda. 

Vıtse-mınıstrdiń málimdeýinshe, elimizge jyl saıyn 20 mıllıard dollar sheteldik ınvestıtsııa quıylady. 

— Investıtsııanyń basym bóligi dál osy is-sharalardyń arqasynda tartyldy. Osyndaı kezdesýler barysynda qazaqstandyq kompanııalar da eksporttyq kelisimder jasasady. Eger sheteldik ınvestıtsııalardy bir kúnge shaqsaq, onda Qazaqstanǵa kún saıyn orta eseppen 50 mıllıon dollar ınvestıtsııa quıylady, — deıdi spıker.

Osylaısha Ulttyq ekonomıka mınıstriniń orynbasary elimizde ótip jatqan ımıdjdik is-sharalarǵa jumsalatyn qarjynyń aqtalatynyn aıtyp otyr. Sondaı-aq is-sharalardyń deni demeýshilerdiń qoldaýymen ótedi. 

— Buǵan deıin Ulttyq ekonomıka mınıstri Úkimettiń shyǵysty shamamen 400 mıllıard teńgege qysqartqanyn málimdegen bolatyn. Bul soma bar, biraq naqty tizim qazir qolymda joq, — dep tolyqtyrdy Arman Qasenov.

Eske sala ketsek, byltyr ımıdjdik is-sharalardan únemdelgen qarjynyń qaıda jumsalatyny týraly jazǵan bolatynbyz

Сейчас читают