Imıdjdik jobalardan bas tarttyq – Jambyl oblysynyń ákimi

ASTANA. QazAqparat – Biz ımıdjdik jobalardan bas tartyp, bar kúshti áleýmettik máselelerge jumsap otyrmyz. Ortalyq kommýnıkatsııalar qyzmetinde ótken brıfıngide Jambyl oblysynyń ákimi Nurjan Nurjigitov osylaı málim etti, dep habaraıdy QazAqparat tilshisi.

«Oblys ortalyǵy Taraz qalasyna qatysty qysqasha toqtalyp ótsem. Biz ımıdjdik jobalardan bas tarttyq. Bar kúshti áleýmettik máselelerge jumsap otyrmyz. Búginde 1,1 mlrd teńgege 2 kósheni qaıta jańǵyrtý, 3,4 mlrd teńgege 118 kósheni ortasha jóndeýden ótkizý, 3,5 mlrd teńgege qalanyń barlyq ırrıgatsııa júıelerin qalpyna keltirý, 3,7 mlrd teńgege 7 massıvte aýyz sý qubyrynyń qurylysy jáne 2 temir jol ótkelin salýǵa smetalyq qujattar ázirleý sııaqty aýqymdy jobalar iske asýda», - dedi óńir basshysy.

Ákimniń aıtýynsha, Taraz qalasynan jer telimin alý úshin 114 myńǵa jýyq adam kezekte tur. Al, memlekettik qordan turǵyn úı alý kezeginde 21 122 adam esepke alynǵan.

«Osy ózekti áleýmettik máseleni sheshý maqsatynda qalanyń bas josparyna ózgeris engizip, ınfraqurylymdy damytý, kópqabatty turǵyn úı máselelerin sheshý úshin qala mańyndaǵy 2 aýdannyń aýmaǵy 11 755 gektar jerdi quraıtyn 14 eldi mekenin qosý arqyly qalany 2 aýdanǵa bólý týraly sheshim qabyldandy. Qazirgi tańda tıisti qujattardy rásimdeý bastalyp ketti.Bul baǵyttaǵy barlyq qabyldanatyn sheshimder birinshi kezekte jergilikti turǵyndardyń pikirin eskere otyryp qabyldanatyn bolady», - dep túıindedi Jambyl oblysynyń ákimi Nurjan Nurjigitov.