Ymdaý tilin zańnamalyq deńgeıde taný máselesine Úkimet jaýap berdi
ASTANA. KAZINFORM – Premer-mınıstr Oljas Bektenov Májilis depýtattarynyń Qazaqstanda ymdaý tilin zańnamalyq deńgeıde taný týraly saýalyna jaýap berdi.
Úkimet basshysynyń aıtýynsha, bul másele boıynsha halyqaralyq tájirıbe zerttelgen.
«Germanııa, Reseı, AQSh, BAÁ, Qytaı, Túrkııa jáne basqa da birqatar elde bul norma múgedektigi bar adamdardyń teń quqyqtaryn qamtamasyz etý turǵysynan qarastyrylady. Keıbir memleketterde ymdaý tilin damytýǵa baǵyttalǵan arnaıy zańdar qabyldanǵan. Al basqa elderde bul másele salalyq normatıvtik quqyqtyq aktiler arqyly retteledi», – dedi Oljas Bektenov.
Premer-mınıstrdiń málimetinshe, Qazaqstan zańnamasynda estý jáne sóıleý qabileti buzylǵan azamattardy áleýmettik qorǵaý, ońaltý, sýrdoaýdarma qyzmetterin kórsetý, ınklıýzıvti bilim berý jáne qoljetimdi ortany qamtamasyz etý tetikteri qarastyrylǵan.
«Ulttyq bilim berý derekter bazasynyń málimetine sáıkes, jyldyń basynda elimizde erekshe bilim berý qajettilikteri bar 237 myń bala tirkelgen. Onyń ishinde estý qabileti buzylǵan balalar sany – 4576. Sonyń 851-i sańyraý, 3825-i nashar estıtin balalar. Sańyraý balalar 22 arnaıy mektep pen 3 arnaıy balabaqshada bilim alady», – dedi Úkimet basshysy.
Onyń aıtýynsha, Qazaqstanda qazaq jáne orys tilderindegi «e-Ymdaý» elektrondy beınesózdigi men e-Ymdau mobıldi qosymshasy ázirlengen.
Arnaıy pedagogıka salasyndaǵy mamandardy 17 joǵary oqý orny daıarlaıdy. Qazir bul baǵytta 5424 stýdent bilim alýda. Al sýrdopedagogtardy úsh joǵary oqý orny daıyndaıdy, onda 360 adam oqyp jatyr.
Sondaı-aq elimizde ınklıýzıvti múmkindikterdi keńeıtý úshin jasandy ıntellekt tehnologııalary engizilýde.
«Joǵary oqý oryndarynda 200-den astam jasandy ıntellekt agenti ázirlendi. Olardyń qatarynda elektrondy sýrdoaýdarmashy da bar. Sonymen birge ymdaý tilin úıretýge arnalǵan JI agenti ázirlenip jatyr. Bolashaqta qazaq tilindegi bilim berý kontentin skills.enbek platformasyna engizý josparlanǵan», – dedi Oljas Bektenov.
Premer-mınıstrdiń málimetinshe, «Múgedektigi bar adamdardy áleýmettik qorǵaý» portalynda estý qabileti buzylǵan azamattarǵa beıimdelgen 20 myńnan astam nysan týraly málimet qamtylǵan «Qoljetimdiliktiń ınteraktıvti kartasy» jumys isteıdi.
Sonymen qatar ol ymdaý tili mamandary kórsetetin qyzmet kólemin arttyrý qosymsha qarjylandyrýdy talap etetinin atap ótti.
«Bul baǵyttaǵy jumys memlekettik organdar men Úkimettiń turaqty baqylaýynda», – dedi Premer-mınıstr.
Aıta keteıik, buǵan deıin Qazaqstanda ymdaý tiline arnalǵan elektrondyq sózdik ázirlengeni habarlanǵan bolatyn.
