Imashev gaz kondensatynyń keni keleshekte Astrahan zaýytynda óńdelýi múmkin - Munaı jáne gaz mınıstri

Bul týraly búgin Parlament Senatynyń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zań jobasyn talqylaý barysynda málim boldy.

Toqtala ketetin jaıt, senator Sársenbaı Eńsegenov «Imashev gaz kondensaty ken ornyn» Reseımen birge ıgerý týraly aqparatqa oraı Munaı jáne gaz mınıstrine saýal joldap, onyń naqty jaǵdaıyn suraǵan bolatyn. «Atalǵan ken orny burynnan belgili, bes jyl buryn birikken kásiporyn da qurylǵan, alaıda onyń jumysy bizge belgisiz. Bul ken orny Atyraý oblysy Qurmanǵazy aýdanynyń eldi mekenderine jaqyn ornalasqan. Ken ornynda kómirsýtegi de joǵary. Ony ıgerý qashan bastalady? Alynǵan ónim qaı elde óńdeledi?», dep suraǵan edi senator.

Óz kezeginde Munaı jáne gaz mınıstri Uzaqbaı Qarabalın kelisim boıynsha «Imashev ken ornyn» Qazaqstan men Reseı birlese ıgeretinin atap ótti. «Jaqynda ǵana jasalǵan kelisim boıynsha ken ornyn birlese barlaıtyn bolamyz. Sosyn barlyq jumystyń nátıjesi boıynsha talqylaýlar júrip, ken ornyn ıgerýge qatysty taǵy da qosymsha kelisim jasalady. Sondyqtan da, ken ornynyń ıgerilý ýaqytyn belgileýge áli erterek. Sonymen qatar, ken ornynan alynatyn munaı men gazdy óńdeý keleshekte Astrahan zaýytyna jiberilýi múmkin. Bul birinshiden, ken ornynyń osy qalaǵa jaqyn jatýynan, ekinshiden, Imashev gaz kondensaty ken ornynyń kúkirt deńgeıi asa joǵary. Sondyqtan da, jańa zaýyt salý kóp qarjyny qajet etýshi edi», - deıdi U. Qarabalın.