Imantaý-Shalqar týrızm aımaǵyna suranys artyp keledi
PETROPAVL. KAZINFORM - Soltústik Qazaqstan oblysyna ótken jyly 165 myń adam qydyryp kelse, sonyń alpys myńnan astamy Imantaý-Shalqar kýrorttyq aımaǵyn demalýǵa tańdaǵan.
Bul óńir týrısterdi eń aldymen kórkem tabıǵatymen, taza aýasymen qyzyqtyrady. Kókpen talasqan qaraǵaılar, aınadaı jarqyraǵan móldir kólder, kók shóbi samal jelmen terbelgen jazyq dala. Soltústik Qazaqstannyń tabıǵaty - tynyshtyq pen sulýlyqty izdegen jan úshin taptyrmas meken. Ásirese Imantaý men Shalqar kólderiniń mańy jaz mezgilinde tabıǵattyń erekshe boıaýyna enip, túrlene túsedi. Búginde osy kórikti ólkeniń týrıstik áleýetin arttyrý baǵytynda SQO-da aýqymdy jumystar qolǵa alynǵan.
Infraqurylym jańaryp jatyr
SQO kásipkerlik jáne ındýstrııalyq-ınnovatsııalyq damý basqarmasynyń málimetinshe, ótken jyly kýrorttyq aımaqtaǵy 20,6 shaqyrym avtomobıl jolyna ortasha jóndeý júrgizilip, bul maqsatqa 1,8 mlrd teńge bólindi. Sonymen qatar demalys oryndaryn sapaly ınternetpen qamtamasyz etý úshin 5,2 shaqyrym talshyqty-optıkalyq baılanys jelisi tartylyp, jeti demalys bazasy joǵary jyldamdyqtaǵy ınternetke qosyldy.
Týrısterdiń qaýipsizdigin arttyrý maqsatynda Imantaý jáne Shalqar kólderiniń jaǵalaýynda jalpy quny 110 mln teńge bolatyn eki zamanaýı modýldik qutqarý beketi ornatyldy. Qazirgi tańda kýrorttyq aımaqta 35 sý-qutqarý beketi jumys isteıdi. Budan bólek, 2025 jyly týrıstik polıtsııa quryldy.
Bıyl da ınfraqurylymdy damytý jalǵasady. Josparǵa sáıkes, demalys bazalaryna deıin qosymsha 12 shaqyrym talshyqty-optıkalyq kabel tartý kózdelgen.
Sondaı-aq eki modýldik týrıstik polıtsııa beketi ornatylyp, týrısterdiń qaýipsizdigin qamtamasyz etý sharalary kúsheıtiledi.
Kýrorttyq aımaqtaǵy ekologııalyq baǵyttardy damytý da nazardan tys qalmaǵan. Jalpy uzyndyǵy 15,3 shaqyrym bolatyn ekosoqpaqtardy abattandyrý josparlanǵan. Bul jumys aıasynda oryndyqtar, baǵyttaýshy belgiler, qorshaýlar, qoqys jáshikteri men aqparattyq stendter ornatylady.
Jańa demalys oryndary ashyldy
Byltyr Imantaý kóliniń jaǵasynda 50 oryndyq «Fenıks» demalys bazasy paıdalanýǵa berildi. Budan bólek, Imantaý-Shalqar kýrorttyq aımaǵynda 2026–2027 jyldarǵa shaqtalǵan jalpy ınvestıtsııa kólemi 3,3 mlrd teńge bolatyn 15 joba júzege asady.
Sondaı-aq kásipkerler demalys oryndaryn keńeıtý, jańǵyrtý jumysyn qolǵa alǵan. Máselen, «Jemchýjına» demalys bazasynda 7 qysqy úıdiń qurylysy bastaldy, aldaǵy ýaqytta taǵy 7 úı salý josparlanǵan.
Jeke kásipker Janabaevtyń demalys bazasynda 3 kottedj ben ashana paıdalanýǵa berildi.
«Qazyǵurt» demalys bazasynda keńeıtý jumystary qolǵa alynǵan. Munda eki qabatty jatyn korpýs salyndy. Sondaı-aq bir Barnhouse úlgisindegi demalys úıi men úsh kottedjdiń qurylysy júrip jatyr.
Al «Chernaıa lagýna» demalys bazasynda byltyr jańǵyrtý jumystary aıaqtalyp, jalpy 36 orynǵa arnalǵan 9 demalys úıi tolyq modernızatsııadan ótti.
Sonymen qatar «Ajar» demalys bazasynda keńeıtý jumystary júrgizilip, jalpy 30 oryndyq úsh jańa aǵash úıdiń qurylysy aıaqtaldy.
Týrızmniń damýy kadrge de baılanysty
Óńirde týrızm salasyna qajet kadr daıarlaý máselesine de kóńil bólinip jatyr. 2024 jyly Petropavlda gıd-ekskýrsovodtardy halyqaralyq WFTGA ádistemesi boıynsha oqytý uıymdastyrylyp, 13 maman sertıfıkat alǵan.
Ótken jyly óńirde qonaq úı bıznesi, týroperatorlar men gıdterdiń qatysýymen servıstik qyzmet sapasyn arttyrýǵa arnalǵan semınarlar ótkizildi. Al bıyl gıdterdi qaıta daıarlaý jumystary jalǵasyp, baǵdarlamaǵa ınklıýzıvti týrızm baǵytyndaǵy arnaıy oqytý engizilmek.
Salaǵa qajetti mamandardy Kozybayev University, Zeınep joǵary kópsalaly kolledji jáne Gýmanıtarlyq-tehnıkalyq kolledji daıarlap jatyr. Oqý barysynda stýdentter týrızmdi uıymdastyrý, qonaqjaılylyq ındýstrııasyn basqarý, ekskýrsııalyq qyzmet kórsetý, týrısterdi kásibı súıemeldeý baǵyttary boıynsha bilim alady. Sonymen qatar shet tilderi oqytylyp, bolashaq mamandardyń kásibı biliktiligin arttyrýǵa jaǵdaı jasalǵan.
Týrıster qaı elderden keledi?
SQO kásipkerlik jáne ındýstrııalyq-ınnovatsııalyq damý basqarmasynyń málimetinshe, óńirge keletin demalýshylardyń basym bóligi ishki týrısterdiń enshisinde. Olar barlyq qonaqtardyń shamamen 94,5% alyp otyr.
Sheteldik týrıster arasynda óńirge Reseı, Qytaı, Germanııa, Túrkııa, Belarýs, Ýkraına, Ózbekstan jáne Ázerbaıjannan kóp keledi. Demalýshylardyń negizgi legi ádette Reseı men TMD elderiniń azamattary.
Sonymen qatar sońǵy jyldary Úndistan, Ońtústik Koreıa, Polsha, AQSh jáne basqa da Azııa men Eýropa elderiniń týrısteri tarapynan qyzyǵýshylyq artyp keledi.
Buǵan deıin Qazaqstan týrızmin nasıhattaýǵa halyqaralyq blogerler tartylǵanyn jazǵan edik.
