Imantaý-Shalqar kýrortty aımaǵyna 23 mlrd teńge bólinedi - SQO
PETROPAVL. QazAqparat – Soltústik Qazaqstan oblysy ákimdiginde týrızmdi damytý máseleleri qaraldy. Basty nazar Imantaý-Shalqar kýrort aımaǵyna aýdaryldy, dep habarlaıdy QazAqparat.
SQO ákimdiginen málim etkendeı, búginde Imantaý-Shalqar kýrortty aımaǵy úzdik 10 jobanyń qataryna enedi. Ony odan ári damytýǵa 23 mlrd teńgege jýyq qarjy quıylmaq. Bul aqshaǵa ınfraqurylymdy damytý kózdelgen. Sońǵy 3 jylda Aıyrtaý aýdanynda 273 shaqyrym jol jóndeldi. Bul týrısterdiń aǵymyn 40 paıyzǵa ulǵaıtýǵa múmkindik berdi.
«Byltyr kýrortqa 45 myń adam kelse, bıylǵy segiz aıda 63 myń adam demaldy. Jyl sanap jolǵa bólingen qarjy kólemi ulǵaıyp keledi. 2017 jyly 900 mln teńge, bıyl 3,8 mlrd teńge jumsaldy», — dedi oblys ákimi Qumar Aqsaqalov.
Investorlar jyl on eki aı jumys isteıtin demalys bazalaryn salady. Bıyl Imantaý men Shalqarda 5 jańa demalys orny ashylady. «Shalqar sý» shıpajaıy jóndelýde. Jalpy jyl sońyna deıin 1 mlrd teńge somasyna taǵy birqatar nysan iske qosylmaq.
Budan bólek, sharalar josparynda «Botaı» murajaıy men týrısterge arnalǵan Vızıt ortalyǵynyń qurylysy qarastyrylǵan. Imantaý kóliniń jaǵajaıy abattandyrylyp, velosıped jáne at serýenine arnalǵan joldar jasalady, aımaqty sholý alańy paıda bolady.
