Imantaý-Shalqar kýrortty aımaǵyn damytý jospary ázirlenýde
ASTANA. QazAqparat - Imantaý-Shalqar kýrortty aımaǵyn damytý jospary ázirlenýde. Bul týraly búgin Ortalyq komýnıkatsııalar qyzmetindegi brıfıngte Soltústik Qazaqstan oblysynyń ákimi Qumar Aqsaqalov aıtty, dep habarlaıdy QazAqparat tilshisi.
«Biz týrızmdi óńir ekonomıkasyn damytýdyń mańyzdy bólikteriniń biri retinde qarastyramyz. Bizdiń óńirimizdegi týrıster úshin eń tartymdysy - bul Soltústik Qazaqstannyń marjany sanalatyn Imantaý-Shalqar kýrortty aımaǵy», - dedi ol.
Óńir basshysynyń aıtýynsha, ol jerge emdik qasıeti bar, sý taza Shalqar men Imantaý kólderi ornalasqan.
«Memleket basshysynyń tapsyrmasyna sáıkes Imantaý-Shalqar kýrortty aımaǵyn damytýdyń jeke jospary ázirlenip jatyr. Astana, sonymen qatar Reseı Federatsııasy óńirleri baǵytyndaǵy avtomobıl joldary kúrdeli jóndeýden ótti», - dedi Qumar Aqsaqalov.
Foto: qazaqtimes.com
