Imantaý-Shalqar kýrorttyq aımaǵynda týrıstik polıtsııanyń modýldik beketteri jumys isteıdi
PETROPAVL. KAZINFORM — Soltústik Qazaqstan oblysyndaǵy Imantaý-Shalqar kýrorttyq aımaǵynda týrıstik polıtsııanyń zamanaýı eki modýldik beketi paıdalanýǵa berildi.
SQO Polıtsııa departamenti baspasóz qyzmetiniń málimetinshe, Shalqar men Imantaý týrıstik aımaǵynda jol qozǵalysy jyl boıy derlik qarqyndy. Buǵan deıin aýyl turǵyndary men demalýshylardyń qaýipsizdigin negizinen ýchaskelik polıtsııa ınspektory qamtamasyz etse, endi bul jumys týrıstik polıtsııa qyzmetkerleriniń kúshimen nyǵaıtyldy.
Máselen, Shalqar kóliniń jaǵalaýynda 23 demalys orny jumys isteıdi. Buǵan deıin polıtseıler olarǵa aýdan ortalyǵynan 33 shaqyrym jol júrip, 20-35 mınýtta jetetin. Jańa modýldik beketter Aıyrtaý aýylynyń ýchaskelik polıtsııa pýnktinen 9 shaqyrym, Lobanovo aýylynyń ýchaskelik polıtsııa pýnktinen 15 shaqyrym qashyqtyqta ornalasqan. Bul shaqyrtý ornyna jetý ýaqytyn úsh esege qysqartyp otyr. Nátıjesinde qylmystardy izin sýytpaı ashý jáne jol qozǵalysyn baqylaý tıimdiligi artty.
Jylytý júıesimen jabdyqtalǵan modýlderde azamattardy qabyldaýǵa arnalǵan kabınet, shaǵyn asúı men jatyn bólme, dýshy bar sanıtarlyq torap qarastyrylǵan. Sondaı-aq monıtorlar arqyly syrtqy beınebaqylaý kameralarynan túsetin keskinder kórsetiledi. Ǵımarattardyń janynan garaj jáne týrnık ornatylǵan vorkaýt alańy da salynǵan.
Nysannyń ashylý saltanatynda tártip saqshylaryna sondaı-aq jańa qyzmettik avtokólikterdiń, kvadrotsıklderdiń jáne jyljymaly polıtsııa pýnktteriniń kiltteri tabystaldy.
Bıyl oblystyq bıýdjetten quqyq qorǵaý organdarynyń materıaldyq-tehnıkalyq bazasyn nyǵaıtýǵa 4,5 mlrd teńgeden astam qarjy bólindi.
Buǵan deıin Kólsaıda 15 mlrd teńgege 6 km aspaly jol salynatynyn jazǵan edik.