Imantaý-Shalqar demalys aımaǵyna kelgen týrıster sany úsh jylda eki ese artqan
PETROPAVL. KAZINFORM – Soltústik Qazaqstan oblysy Aıyrtaý aýdanyndaǵy Imantaý-Shalqar kýrorttyq aımaǵynyń tanymaldyǵy jyldan-jylǵa artyp keledi. Tek bıyl biregeı tabıǵaty bar aımaqty 100 myńnan astam adam demalý úshin tańdaǵan.
Aıyrtaý aýdanynyń ákimi Meıram Meńdibaevtiń aıtýynsha, qazirgi ýaqytta aýdanda táýligine 4 myń demalýshyny qabyldaı alatyn 46 týrıstik nysan jumys isteıdi. Jyl saıyn demalys oryndarynyń sany artyp keledi, nátıjesinde bıyl jańadan 224 adam jumyspen qamtyldy.
- Byltyrdan bastap 500 mln teńge ınvestıtsııaǵa bes demalys aımaǵy jańǵyrtyldy. Máselen «Rodnıkı» demalys aımaǵynyń jatyn korpýsy jańartyldy, «Shalqaraýyly» demalys aımaǵyna kıiz úıler tigildi, sondaı-aq «Solnechnoe VIP» demalys aımaǵynda jazǵy meıramhana ashyldy.
Taǵy toǵyz demalys aımaǵynda 1,8 mlrd teńge ınvestıtsııaǵa aýmaǵy keńeıtildi, qyzmet kórsetý sapasy jaqsardy, - deıdi Meıram Meńdibaev.
Buryn Shalqar, Imantaý kólderine demalýǵa kelýshiler joldyń nasharlyǵyna jıi shaǵymdanatyn. Bul másele de birtindep sheshilip jatyr.
- Aýdannyń ınfraqurylymyn jáne joldardyń sapasyn jaqsartý maqsatynda jumys júrgizilip jatyr. Sońǵy jyldary «Solnechnoe VIP» demalys aımaǵyna kireberis jáne «Shalqar sý» sanatorııine baratyn joldy qosa alǵanda, uzyndyǵy 39,3 km úsh avtomobıl jolyna 1,5 mlrd teńgege jóndeý júrgizildi. Osy jyly 400 mln teńge somasyna «Sokol» saýyqtyrý ortalyǵyna baratyn joldyń qurylysy aıaqtaldy.
«Arman», «Turpan» demalys bazalaryna jáne «Olımpıets» demalys aımaǵyna aparatyn jalpy uzyndyǵy 6,4 shaqyrymǵa jýyq joldarǵa asfalt tóseý jumystary aıaqtaldy, bul maqsatqa 369 mln teńge jumsaldy, - deıdi aýdan ákimi.
Meıram Meńdibaevtyń aıtýynsha, kelesi jyly jumys jalǵasady, «Bastaý», «Chernaıa lagýna», «Gornıak», «Pereýzına», «Zarıa» demalys bazalaryna baratyn joldar jóndeledi.
Budan bólek Nıkolskoe aýylyndaǵy «Botaı» murajaı-qoryǵyna, Syrymbet aýylyndaǵy «Aıǵanym» qonysyna jalpy uzyndyǵy 19 km sapaly jol tóseý josparlanǵan. «Ana men bala úıi» shıpajaıyna kireberis jolda jóndeý jumystary jalǵasady.
Al óńirdegi ekinshi tanymal demalys aımaǵy – emdik qasıeti bar Meńgeser tuzdy kóli jergilikti turǵyndar arasynda ǵana tanymal emes, jylda Qazaqstannyń ár óńirinen jáne TMD elderinen týrıster kóptep keledi. Mamlıýt aýdandyq ákimdiginiń málimetinshe, bıyl jazda kóldiń densaýlyqqa paıdaly sýyna túsip, jaǵasynda qyzdyrynýǵa 10 myńnan astam adam kelgen.
Munda da demalýshylarǵa yńǵaıly bolýy úshin abattandyrý jáne ınfraqurylymdy damytý jumystary qolǵa alynǵan.
Petropavldaǵy tarıhı nysandardyń keıbiri apatty jaǵdaıda turǵanyn jazǵan edik.