Imanǵalı Tasmaǵambetov oqýshynyń ólimine qatysty túsinikteme berdi

«Qazir tergeý amaldary júrýde. Bul, árıne, qaıǵyly oqıǵa. Bul týraly belgili bolǵanda-aq bilim berý basqarmasynan, ІІD-den mamandardy sol jerge jiberdik. Olar oqıǵanyń mán-jaıyn anyqtaýda. Adam óltirgen bala Pavlodar oblysynda psıhologııalyq dıspanserde tirkeýde turyp, munda keler aldynda medıtsınalyq mekemeden onyń qarapaıym mektepte bilim ala alatynyn rastaıtyn anyqtama qaǵazyn berdi degen boljam bar. Bul boljam ǵana, sondyqtan onyń aq-qarasyn ajyratpaı jatyp, anyǵyn aıtý áli erte», - dedi I. Tasmaǵambetov.

«Bul - qaıǵyly oqıǵa. Bundaı jaıttyń oryn alýynda pedagogtardy kinálaýǵa bolmaıdy. Mundaı jaǵdaıdy aldyn ala boljaý múmkin emes, alaıda budan qorytyndy shyǵarǵan durys. Qazir balalardyń mekteptegi qarym-qatynasynyń qandaı bolǵanyn anyqtaýdamyz. Osylaısha mundaı oqıǵalardyń qaıtalanýynyń aldyn alý úshin qajetti sharalar qabyldaıtyn bolamyz», - dep qosty qala ákimi.

Eske sala ketıik, 16 qyrkúıek kúni oqý úrdisi ýaqytynda №76 orta mekteptiń oqýshylary eregisip qalady, janjal barysynda bireýi ekinshisiniń keýde tusyna qalammen qatty soqqy jasaǵan bolatyn. Keýdege tereńdeı engen jaraqat saldarynan 8-synyp oqýshysy oqıǵa ornynda jantásilim etti.

Elordalyq Esil aýdanynyń prokýrory Birjan Majrenovtiń aıtýynsha, atalǵan oqıǵa boıynsha Astana qalasy ІІD tergeý basqarmasymen aldyn ala tekserý amaldary júrgizilip jatyr. «Aldyn ala tekserý amaldaryn ótkizý QR Qylmystyq Kodeksiniń 15-babyna sáıkes, kámelettik jasqa jetpegen sezikti qylmystyq jaýapkershilikke tartylatyn jasqa, ıaǵnı 14-ke tolmaǵandyǵy negiz boldy. Osy oraıda ólimniń sebebin anyqtaýǵa baǵyttalǵan sot-medıtsınalyq saraptama jáne basqa da sot-krımınalıstıkalyq saraptamalary taǵaıyndaldy», -dedi ol.

Sonymen qatar, kúdikti 2007 jyldan psıhıkalyq densaýlyq ortalyǵynda esepte turǵany anyqtaldy. Alaıda bıylǵy tamyzda dárigerlik-keńestik komıssııanyń qorytyndysyna sáıkes, 2014-2015 oqý jylynda jalpy oqý ádistemelik baǵdarlama boıynsha orta mektep jaǵdaıynda oqýy usynylǵan. Bul onyń orta mektepke qabyldanýyna negiz bolǵan.

Sondaı-aq, QR Bilim jáne ǵylym mınıstrligi tarapynan osy oqıǵanyń mán-jaıyn anyqtaýǵa baılanysty komıssııa quryldy.

Al Astana qalasynyń Bilim basqarmasy qyrkúıek-qazan aılarynda barlyq mektepterdiń joǵary synyptarynda túrli sabaqtar, zertteýler, testileý men oıyndar ótkizýdi josparlap otyr.

Atap aıtqanda, adamdar arasyndaǵy ózara qarym-qatynastar týraly túsinikterin damytý maqsatynda 13-14 jastaǵy jasóspirimder arasynda qundylyqtyq baǵdarlardy jáne soǵan sáıkes minez-qulyq formalaryn qalyptastyrýǵa baǵyttalǵan psıhologııalyq sabaqtar; balalardyń psıhologııalyq jaılylyǵyn qamtamasyz etý, qorqynysh, senimsizdik tárizdi psıhıkalyq tosqaýyldardy joıýǵa yqpal etý maqsatynda 9-11 synyptarda túrli kıkiljińdi jaǵdaılarǵa qatysty róldik oıyndar; ujymda tulǵaaralyq qarym-qatynastardy, resmı jáne beıresmı qurylymdardy, toptardy, tulǵaaralyq qarym-qatynastardyń ózgerý sıpatyn anyqtaý maqsatynda áleýmettik zertteýler júrgizilip, oqýshylardyń psıhologııalyq salaýattylyǵyn anyqtaý úshin testileý ótkiziledi. Bul balalarǵa tolyq dıagnostıka júrgizýge jáne kámeletke tolmaǵandardyń minez-qulyqtaryndaǵy qalyptydan aýytqýshylyqtardy aldyn-ala anyqtaýǵa múmkindik beredi. Adamgershilik tárbıe berý sabaqtary aıasynda mektep dırektorlaryna, olardyń oqý-tárbıe isi jónindegi orynbasarlaryna, synyp jetekshilerine arnalǵan «Qazirgi zamanda rýhanı-adamgershiliktik tárbıe berýdiń basymdyqtary», «Oqýshylardy rýhanı-adamgershilikke tárbıeleýdegi ustazdyń róli» taqyryptarynda oqytý semınarlary uıymdastyrylady. Quqyqtyq saýattylyqty arttyrý jáne quqyqbuzýshylyqtardyń aldyn alý maqsatynda «Quqyqtyq oqytýdy» ótkizýdiń vedomstvoaralyq kestesi ázirlendi. Shara aıasynda dárister oqý, sporttyq-mádenı sharalar, trenıngter men semınarlar ótkizý josparlanǵan. Sonymen qatar oqýshylarmen kóshpeli praktıkalyq semınarlar, ekskýrsııalar ótkiziledi. Sonymen qatar ata-analarǵa arnalǵan «Balalardy laıyqty deńgeıde tárbıelemegeni úshin ákimshilik jazaǵa tartý» jáne «Otbasynda toleranttylyqqa tárbıeleý» taqyryptaryndaǵy trenıngter ótkiziledi.