Imandylyqqa, otansúıgishtikke baýlıtyn ıslam dinin qurmetteýimiz kerek - N.Nazarbaev
ASTANA-ULYTAÝ. QazAqparat - Imandylyqqa, otansúıgishtikke baýlıtyn ıslam dinin qurmetteýimiz kerek. Bul týraly búgin «Habar» telearnasyna eksklıýzıvti suhbat bergen QR Prezıdenti Nursultan Nazarbaev aıtty.
«Biz táýelsizdik jyldarynda dinimizdi qaıtaryp kele jatyrmyz. Qazir qarap otyrsań, qazaqtyń esh ýaqytta dininen aıyrylmaǵandyǵyn kórýge bolady», - dedi Elbasy.
QR Prezıdentiniń atap ótýinshe, búginde bizdiń ǵana dinimiz jaqsy dep júrgen basqa elderdiń jaǵdaıy múshkil bolýda. Din úshin bir musylman dini ishinde súnnıt pen shııtke bólinip, qan tógip jatqan halyqtar da bar. Bir dinniń ishinde soǵysyp jatqan katolıkter de jetkilikti. Sondyqtan da din máselesinde barynsha abaı bolýymyz kerek.
«Dinge bas uryp júrgen kezde biz dinniń jaman jaǵyna túsip ketpeýimiz kerek. Bizge zııan keltiretin din aǵymdary bar. Qan tógip, soǵyspen din ornatyp, memlekettik din jasaımyz degender bar. Muhammed paıǵambardyń sahabalary Omar, Osman, Álıdiń kezindegi halıfatty qaıta ornatamyz degen bul jaýlap alý máselesi bolatyn», - dedi N.Nazarbaev.
Memleket basshysynyń atap ótýinshe, ımandylyqqa baýlý, Otanyn qorǵaý, Qurannyń qasıetterin oryndaý úshin kemtarlarǵa kómektesý, baýyrmalshyl bolý, úlkendi syılaý, eldi birlikke shaqyrý degen syndy máselelermen dindi órkendetetin bolsa, onda dinniń memleketke úlken paıdasy, qamqorlyǵy bolady.
«Mine, osyndaı ózimizdiń musylman dinin, ıslam dinin qurmetteýimiz kerek», - dedi Elbasy.
