Imandy balǵyndar báıgege tústi
ASTANA. QazAqparat - Búginde jyl saıyn elorda meshitterinde mektep oqýshylaryna arnalǵan jazǵy dinı saýat ashý kýrstaryn ótkizý ıgi dástúrge aınalǵany buqaraǵa belgili. Mine, maýsym aıynda bastaý alǵan saýat ashý kýrstary da támam bolyp, balalardyń bilim deńgeıin synap, baǵalaý úshin búgin «Áziret Sultan» meshitinde bilim saıysy ótti, dep habarlaıdy muslim.kz.
«Bilimge qushtar ımandy jas» saıysynda jazǵy kýrsta bilim deńgeıi men alǵyrlyǵymen kózge túsken Astana qalasynyń 7 meshiti men «Nur Astana» ortalyq meshitine qarasty Islam ortalyǵynda tálim alǵan shákirtter synǵa tústi. «Tanystyrý», «Islam tarıhy», «Iman negizderi jáne ǵıbadat» jáne «Ártúrli taqyryptar» atty 4 kezeńnen turatyn bilim básekesinde balalar birinen biri ótken alǵyr, bilimge qushtar ekendikterin baıqatty. Jarys erejesi boıynsha ár aınalymda taqyrypqa sáıkes ekranda tańdaǵan uıashyqtaǵy saýaldarǵa jaýap bere otyryp, sońynan jınaqtalǵan upaıy tómen bolǵan eki qatysýshy oıynnan shyǵyp otyrady. Qazylardyń ortaq sheshimimen 1-oryndy «Tólebaı» meshitinen kelgen Ádilet Jıenǵalıev alyp, oǵan bylǵary qaptamaly úlken Quran kitaby, «Din men dástúr» kitaby jáne arnaıy marapat qaǵazy tabystaldy. Ekinshi jáne úshinshi orynǵa «Nur Astana» ortalyq meshitiniń shákirti Aman Muhtarbek pen «Áziret Sultan» meshiti atynan qatysqan Nursultan Nurbolov laıyqty dep tanylyp, bylǵary qaptamaly Quran kárim, «Din men dástúr» kitaptary men arnaıy marapat qaǵazdaryna ıe boldy. Ózge qatysýshylar da quran kárim, «Din men dástúr» kitaptary men arnaıy syılyqtarmen marapattaldy.
