«Imandy aıdaladan emes, aınalańnan izde» - baspasózge sholý
***
Parlamenttegi úsh partııalyq fraktsııalar ókilderiniń merziminen buryn Májilis jáne barlyq deńgeıdegi máslıhattar saılaýlaryn ótkizý jónindegi bastamasy Qazaqstan jurtshylyǵyn dúr silkindirgenin «Egemen Qazaqstannyń» betterinde kúnde jarııalanyp jatqan pikirler kúndelikti jarııalanýda. Bul bastama, sonymen birge, halyqaralyq qoǵamdastyqtyń da nazaryn aýdaryp otyr. Búgin basylym shetel sarapshylarynyń osy usynysqa oraı bildirgen pikirleriniń toptamasyn «Merziminen buryn saılaý ótkizý: sheteldik sarapshylar ne deıdi?» degen taqyryppen usyndy. Máselen, Germanııa Býndestagynyń depýtaty Genrıh Tsertıktiń oıynsha, qazaqstandyq áriptesteri durys sheshim qabyldady. «Men qazaqstandyq áriptesterimniń sheshimine senemin. Bul dál ýaqytynda, oılastyryla sheshilgen. Qazaqstanda Ult Jospary qabyldandy, elderińiz osy reformany oryndaý jolymen júrip keledi. Álemde turaqsyzdyq oryn alyp jatqanda, osyndaı baǵytta alǵa qaraı jyljý óte durys sheshim. Al jańa Májilis Prezıdent alǵan qoıǵan tapsyrmalardy oryndaýǵa jańa kúshpen kirisedi», - deıdi ol.
Parlament Májilisiniń depýtaty, Aýǵan soǵysy ardagerleri uıymdarynyń «Qazaqstan ardagerleri» qaýymdastyǵynyń tóraǵasy Baqytbek Smaǵulmen «Egemen Qazaqstan» gazetiniń tilshisi arasyndaǵy suhbat bas basylymnyń búgingi nómirinde jarııalandy. Negizinen din máselesine, DAISh sodyrlar tobyna qatysty órbigen suhbat barysynda B.Smaǵul: «Bizdiń topyraǵymyzda ornyqqan ıslam dininiń hanafı mazhabyna qatyp qalǵan qasań qaǵıdalar men birjaqtylyq jat dep oılaımyn. Men teris ıdeıalardyń jeteginde ketken bázbireýler aıtatyndaı, «saqalyń bir tutamnan aspasa, musylman emessiń» deýshilerdi óz basym quptaı almaımyn. Másele, tek saqalda bolsa, men kórgen Aýǵanstan dúnıejúzindegi ozyq elderdiń qatarynda bolar edi ǵoı... Men sondyqtan da Qazaqstan azamattaryn alaýyzdyqtyń áserinen basynan baǵy taıyp, soǵys órtine oranǵan alys-jaqyn elderdiń búgininen sabaq alyp, óz elimizde berik ornyqqan tynyshtyq pen kelisimdi qadirleýge shaqyramyn. Biz tútini túzý shyǵatyn qýatty el bolýymyz úshin ǵylymǵa, bilimge, jańashyldyqqa jaqyn bolyp, elimizdiń tutastyǵy men turaqtylyǵyn qashanda basty orynǵa qoıýymyz qajet dep bilemin», - deıdi. Suhbat taqyryby: «Imandy aıdaladan emes, aınalańnan izde».
***
Qazaqstannyń birneshe qalasynda bir-birinen aýmaıtyn qalalyq ańyz bar. Ol jol boıynda kólik toqtatyp turatyn eles qyz jaıyndaǵy áńgime», - dep jazady «Ekspress K» gazeti senbilik sanyndaǵy «Prızrakı vyhodıat na trassý» degen taqyryptaǵy maqalasynda. Kórkemdik detaldarǵa saı keletin osynaý ańyz túrli qalalarda jeldeı esedi. Máselen, bul qyz Almatyda Qapshaǵaı tas joly boıynsha kólik toqtatyp turatynyn, júrgizýshiler de biraýyzdan ol qyzdyń aıaǵy attyń tuıaǵyna uqsaıtyndyǵyn aıtady. Eń bastysy, álgi eles qyz kóliktiń sońyna túsken kezde teris burylyp qaramaý kerek. Óıtkeni, júrgizýshiniń qoryqqanynan qýat alatyn qyz qýyp jetýi múmkin. Al Astana men Almatyda bul eles qyz - qala syrtynda taksıst qylmyskerdiń qolynan qaza tapqan jan. Ádette, qyz toqtaǵan kólik júrgizýshisine óz úıiniń telefon nómirin aıtyp, ata-anasyna jaǵdaıynyń jaqsy ekendigin aıtýdy ótinedi eken. Al atalǵan nómirge habarlasqan adam onyń ata-anasynan qyzdarynyń qaıtys bolyp ketkendigin estıdi. Maqalada almatylyq ınjener Mereı Ryskeldıevtiń sózin keltirgen.
