Imanbektiń ákesine medal tabystaldy
NUR-SULTAN. QazAqparat – Taıaýda ǵana Grammy syılyǵyn jeńip alǵan Imanbektiń ákesi Marat Súleımenovke birinshi dárejeli «Minsiz qyzmeti úshin» medali tabystaldy, dep habarlaıdy QazAqparat tilshisi.
«Naýryz meıramyna oraı Aqsý garnızonynyń basshylyǵy Ardagerler keńesiniń jáne departamenttiń jeke quramynyń atynan azamattyq qorǵanys ardageri Marat Súleımenovti merekemen ári uly Imanbek Zeıkenovtiń jeńisimen quttyqtap, 1-dárejeli «Minsiz qyzmeti úshin» medalin tabystady», - dep atap ótti Pavlodar oblystyq TJD baspasóz qyzmetinen.
Órtke qarsy qyzmettiń aǵa praporşıgi Marat Zeıkenuly bul salada 1996 jyldan bastap 2016 jylǵa deıin eńbek etken. Osy ýaqytqa deıingi minsiz qyzmeti úshin QR Tótenshe jaǵdaılar mınıstrliginiń 1, 2, 3-dárejeli vedomstvolyq medaldarymen marapattalǵan.
«Qurmetti Marat Zeıkenuly, Aıgúl Súıindikqyzy! Uldaryńyz Imanbektiń álemdegi eń mártebeli mýzyka baıqaýyndaǵy jarqyn jeńisimen shyn júrekten quttyqtaımyz. Adamnyń kez kelgen saladaǵy jetistigi onyń eń jaqyn adamdarynyń, bir qaraǵanda baıqala bermeıtin kúndelikti kúsh-jigerdiń, eńbektiń, shydamdylyq pen jaýapkershiliktiń nátıjesi ekendigi sózsiz. Sizderge zor densaýlyq, otbasylaryńyzǵa amandyq, Imanbekke kásibı jolynda zor tabystar tileımiz. Ol sizderdi jetistikterimen qýanta bersin», - delingen quttyqtaýda.
