Imanbek «Qurmet» ordeniniń ıegeri atandy
ASTANA. KAZINFORM — «Gremmı» júldesin alǵan tuńǵysh qazaqstandyq mýzykant Imanbek Zeıkenov «Qurmet» ordenimen marapattaldy. Bul týraly QR Premer-Mınıstriniń orynbasary — Mádenıet jáne aqparat mınıstri Aıda Balaeva habarlady.
Mınıstrdiń aıtýynsha, Memleket basshysynyń Jarlyǵymen Respýblıka kúnine oraı eldiń ekonomıkalyq jáne qoǵamdyq ómiriniń túrli salalaryn damytýǵa eleýli úles qosqan birqatar azamat marapattaldy. Olardyń keıbiri marapat tabystalar sátte elimizden tys jerde bolǵandyqtan, nagradalaryn ýaqytynda ala almady. Búgin osy qurmetti nagradalardy óz otandastarymyzǵa tabystaý men úshin aıryqsha mártebe boldy.
— «Qurmet» ordenimen Konfessııaaralyq jáne dinaralyq dıalogtyń halyqaralyq ortalyǵy janyndaǵy Sezdiń bastamalaryn iske asyrý departamentiniń burynǵy basshysy Qarlyǵash Qalılahanova jáne «Gremmı» júldesin alǵan tuńǵysh qazaqstandyq mýzykant Imanbek Zeıkenov marapattaldy. Al, Erkebulan Toqtar «Qazaqstannyń eńbek sińirgen qaıratkeri» ataǵyna ıe boldy. Barshańyzdy shyn júrekten quttyqtaımyn! Igilikti joldaǵy qajyrly eńbekterińiz úshin alǵys bildiremin, — dedi mınıstr.
Osyǵan deıin Imanbektiń óńdeýindegi «RÝH» beıneklıpi bir kúnde 17 myńnan astam kórilim jınaǵanyn jazdyq.