Imanbek Jibek joly arnasynyń «Taza qala» jobasyna qatysty
ASTANA. KAZINFORM — Álemge áıgili dıdjeı, Grammy júldesiniń ıegeri Imanbek Zeıkenov Jibek joly arnasynyń «Taza qala» baǵdarlamasynyń túsirilimine qatysty.
Maýsym aıynda Memleket basshysy Qasym-Jomart Toqaevtyń «Taza Qazaqstan» bastamasy aıasynda Prezıdent Teleradıokesheni «Taza qala» aýqymdy telejobasyn qolǵa aldy. Kezekti shyǵarylym Ertistiń jaǵasyndaǵy Pavlodar ólkesine arnaldy.
«Men Qazaqstannyń kóptegen qalalarynda boldym. Meniń oıymsha, bizdiń qala ózgelermen salystyrǵanda óte taza. Zaýyttar bolǵan kúnde de jaǵdaı jaqsy. Qorshaǵan orta da jaǵymdy. Qalada qoqys jáshikteri óte kóp jáne qoqys joq», - deıdi dıdjeı baǵdarlama tilshisine bergen suhbatta.
Imanbek basty hıtty jazýǵa shabyttandyrǵan qalanyń tazalyǵy, estetıkasy jáne damý qarqyny jóninde aıtyp berdi.
«Men munda 2016 jyldan beri turamyn. Sol ýaqyttan beri jańa turǵyn úı keshenderi kóptep salyndy. Óte uzyn jaǵalaý paıda boldy. Qazir munda adamdar da kóptep kele bastady. Buryn olaı bolmaǵan edi», - deıdi I.Zeıkenov.
Aıta keteıik, túsirilim toby Qazaqstannyń iri jáne shaǵyn qalalaryna barady jáne árqaısysynyń tazalyǵy men kórki týraly áńgimeleıdi. Jýrnalıster jergilikti turǵyndarmen kezdesedi, kommýnaldyq qyzmetterdiń jumysyn kóredi. Qoǵamdyq birlestik ókilderimen, aımaqtyń ekologııalyq ómirine belsendi qatysatyn barlyq eriktimen tanysady.
«Taza qala» jobasynyń ár shyǵarylymynda tilshiler jergilikti bılik ókilderimen suhbattasyp, táýelsiz ekolog-sarapshylarmen birge óz baǵalaryn beredi. Bul eldi mekender men jalpy óńirlerdiń sanıtarlyq tazalyq, ekologııalyq tazalyq, abattandyrý boıynsha obektıvti reıtıngin jasaýǵa múmkindik beredi.
Buǵan deıin Kazinform saıtynda Shymkent, Túrkistan, Taraz, Qyzylorda, Óskemen jáne Semeı qalalarynyń tazalyǵy jóninde fotoreportaj serııasy jarııalanǵan edi.
