Imamdarǵa aqıda pánin júrgizý máselesi qolǵa alyndy
ASTANA. 29 naýryz. QazAparat - Imamdarǵa aqıda páni júrgiziledi. Bul jaıynda Qazaqstan musylmandary dinı basqarmasynyń málimetterinde aıtylǵan.
«Aqıda máselesi meshitke kelýshi jamaǵattardyń arasynda talqylanyp júrgen basty taqyryptardyń biri desek artyq aıtqandyq emes. Kúni búgin asyl dinimizdi áli de tolyq túsinbegendikten pe, joq álde, menmendikten be, qalaı bolǵanda da ıslamdaǵy eń kúrdeli, ári názik sala Aqıda máselesin ekiniń biri talqylaı beretin boldy. Bul jerde biz máseleniń durysyn burysynan ajyratpaı jatyp, pikir aıtatyndardy meńzep otyrmyz. Sondyqtan, meshit jamaǵattaryna durys, ıaǵnı «ahli súnnet ýál-jamaǵat» aqıdasyn jetkizý jáne ımamdardyń bilimi men biliktiligin artyrý maqsatynda Atyraý oblystyq «Imanǵalı» ortalyq meshitinde aqıda páni boıynsha dáris bastaldy. Dáriske Atyraý qalasy mańynda ornalasqan meshitterdiń ımamdary, naıb ımamdar men ustazdar qatysady», - delingen onda.
Sabaq barysynda búgingi tańda eki adamnyń basy qosyla ketse oı-kókparǵa túsip, erekshe talqylanyp júrgen máseleler kóterilip, olardy qalaı sheshý jaǵy qarastyrylady. Sondaı-aq, aqıda páni boıynsha qoıylǵan suraqtarǵa Quran jáne súnnetke negizdelgen dáleldermen qalaı jaýap berý kerek ekeni, basqa da kóptegen taqyryptar úıretiledi.
