Imamdardyń jalaqysy arnaıy qordan tólenedi - mınıstr Ermekbaev
«Bul qordyń basty maqsaty - qaıyrymdylyq qarajatyn jınaqtaý, áleýmettik jaǵynan az qamtylǵan jáne osal toptarǵa kómek berý, qaıyrymdylyqtan túsken qarjyny jáne tapqan tabysty zaıyrly maqsattarǵa baǵyttaý. Budan bólek, taǵy bir mańyzdy baǵyt ol - ımamdardy qamtamasyz etý. Bárimiz jaqsy bilemiz, qazirgi kezde ımamdardyń jalaqylary qaıyrymdylyqtan túsetin qarjyǵa tikeleı baılanysty. Úlken qalalarda ımamdardyń jaǵdaıy birqalypty bolsa, aýdan ortalyqtary men shalǵaı eldimekenderde olardyń jaǵdaıy turaqsyz», - dep atap kórsetti Ermekbaev.
Mınıstrdiń aıtýynsha, ımamdardyń qazirgi qarjylyq jaǵdaıy olardyń ımıdjine keri áserin tıgizip otyr. Oǵan qosa, dál osy olqylyqty destrýktıvti aǵymdar óz maqsattaryna paıdalanyp jatady. «Jalpy, bilikti mamandardy problemaly aımaqtarǵa tartý, shalǵaı eldi mekenderge jiberý óte qıyn bolyp ketti. Respýblıka boıynsha 150-den astam meshitte ımam múldem joq. Basqalarynda ımamdar jıi aýysady. Búginde biz ımamdardyń jalaqysyn tikeleı bıýdjetten tóleı almaımyz. Sondyqtan jańa qor arqyly atalǵan ózekti máselelerdi sheshýge bolady dep úmittenimiz», - deıdi Ermekbaev.
«Ýaqyp» korporatıvti qaıyrymdylyq qorynyń quryltaıshylary - Dinder men mádenıetterdiń xalyqaralyq ortalyǵy, Din isteri boıynsha ǵylymı-zertteý ortalyǵy, Dintanýshylar sezi men «Zeket» qaıyrymdylyq qory. Búginde qamqorshylar keńesi men qordyń basshysy saılandy. «Men din salasyna jany ashıtyn azamattardy jáne kásipkerlerdi jańa qordy qoldaýǵa shaqyramyn», - dedi Ermekbaev.
