Imamdar Bas múftıdiń qolynan dıplomdar aldy
ASTANA. 7 mamyr. QazAqparat - Keshe Qazaqstan musylmandary dinı basqarmasynyń tóraǵasy Erjan qajy Malǵajyuly Almatydaǵy Respýblıkalyq ımamdardyń bilimin jetildirý ıslam ınstıtýtynda boldy.
«Bas múftı Instıtýttyń jumysymen, oqý baǵdarlamasymen tanysyp, ımamdardyń bilimi men biliktiligin arttyra túsýdi tapsyrdy. Kezdesýde ǵımarat janynan salynatyn qosymsha qurylystyń jobasy talqylandy»,-delingen QMDB baspasóz qyzmetiniń málimetinde.
QMDB tóraǵasy Erjan qajy Maıamerov ıslamı ilim oshaǵyn aralap shyqqannan keıin din qyzmetkerlerine dıplomdardy tabystaý saltanatty sharasyna qatysty. Oqý ordasynyń 23-toby, ıaǵnı elimizdiń ár aımaǵynan kelip, ilimderin jetildirgen 31 ımam-molda Bas múftıdiń qolynan dıplomdar aldy. Oqýda belsendilik tanytyp, ozat bolǵan úzdik shákirtter alǵys hattarmen marapattaldy.
«Islam - tal besikten jer besikke deıin ilim alýǵa úndeıtin bilim dini. Din joly qıyn da aýyr jol. Shydam men sabyrlylyqty qajet etedi. Osyndaı qıyndyqqa moıymaı, aýyldyq jerlerde ımamdyq qyzmet atqaryp júrgen moldalarǵa Alla razy bolsyn deımiz. Búginde elimizde dinı ahýal birqalypty bolǵanymen, bizge úlken jaýapkershilik júktelip otyr. Sondyqtan jumysymyzdy jandandyra túsip, halqymyzǵa qyzmet etýde tabandylyq tanytýymyz qajet», - dedi túlekterge Erjan qajy Malǵajyuly.
2002 jyly ashylǵan oqý ornynda 4 aılyq kýrstan dinı dáris tyńdap, ilimin jetildirgen ımam-moldalardyń jalpy sany 985-ke jetti.
