IM jylyna 2 mlrd. dollar kóleminde qarjylandyrylady - Ispanııanyń qaýipsizdik jónindegi memlekettik hatshysy
MADRID. QazAqparat - Bizge lańkestikti qarjylandyrý, onyń uıymdasqan qylmyspen baılanysy jáne zańsyz qyzmet salalarynda aqshanyń jylystaýy máselelerine jahandyq jaýap kerek.
Bul týraly «Uıymdasqan qylmyspen kúrestegi strategııalyq barlaý quraldary» atty konferentsııanyń barysynda Ispanııa Koroldiginiń Qaýipsizdik jónindegi memlekettik hatshysy Fransısko Martınes málimdedi.
«Biz lańkestik pen uıymdasqan qylmystyq ózara is-qımylynyń 100-den astam joldaryn anyqtaı aldyq. Olardyń irileri - «Islam memleketin» qarjylandyrý úshin qyzmet etetin «Avala» (aqsha aýdarymdarynyń júıesi - red.) jáne halyqaralyq telefon áńgimelesýlerine arnalǵan telefon dúńgirshekteri», - dep baıandady F.Martınes.
Ol sondaı-aq Ispanııa túrmesine 2001-2005 jj. lańkestik boıynsha aıyptalǵandardyń kem degende 20 paıyzy buǵan deıin basqa qylmystary úshin jabylǵanyn atap ótti.
««Islam memleketi» lańkestik toby óziniń qylmystyq jelileriniń arqasynda jylyna eki mıllıard AQSh dollaryna jýyq qarjy alady, ekinshi orynda shamamen bir mıllıard alatyn «Hamas» tur. Úshinshi orynda 600 mıllıon dollarmen «Kolýmbııanyń revolıýtsııalyq qarýly kúshteri» tur. Bul reıtıngtiń tórtinshi jáne besinshi oryndarynda «Hezbolla» men «Ál-Kaıda» turaqtaǵan. Bul toptar óziniń is-qımyldaryn uıymdasqan qylmystyq toptar qoldanatyn ádistermen jasaıdy. Mysaly, esirtkiniń zańsyz aınalymy, qaraqshylyq jáne uıymdardan qorqytyp aqsha talap etý», - dep habarlady qaýipsizdik jónindegi memlekettik hatshy.
