Ym tilin qazaqshalaǵan startap brıtandyq Tatler jýrnalynyń syılyǵyn jeńip aldy
ASTANA.KAZINFORM - Ym tilin qazaqsha ǵylymı turǵyda zerttep, alǵashqy tsıfrlyq sýrdoaýdarma júıesin jasaǵan startap Tatler Impact Awards syılyǵy «Innovatsııa» atalymynyń úzdigi atandy.
Joba avtory Nurzada Amangeldiniń aıtýynsha, ǵylymı zertteý barysynda ym tiliniń qazaqsha zerttelmegeni anyqtalǵan.
— Dıssertatsııa jazý kezinde zertteý júrgizip, qazaq ym tiliniń múlde qalyptaspaǵanyn kórdim. Qazaqsha ym tili jeke til bola alady degen tujyrym jasap, ony dáleldeý úshin úlken baza jınaýǵa týra keldi, - deıdi ol.
Búginde startap komandasynda toǵyz adam jumys isteıdi. 2023 jyly halyqaralyq qarjylandyrý alǵannan keıin sózdik baza jınaý, lıngvıstıkalyq saraptama jáne tehnıkalyq modeldeýdi qatar júrgizý bastalǵan.
– Komanda mektepter, ınternattar men arnaıy ortalyqtarmen jumys istep, qazaq ym tiliniń sózdik qoryn ózderi qalyptastyrdy. Kóptegen lıngvıster ymdy jalpy qımyl retinde qarastyrǵandyqtan, naqty materıal tabý qıyn boldy. Aqparattyń 60%-y qol qımylymen, 40%-y erin men mımıka arqyly beriledi. Eger adam qazaqsha sóıleıtin bolsa, onyń artıkýlıatsııasy da qazaqsha. Demek, qazaq ym tili jeke til retinde qarastyrylýy tıis, - deıdi sarapshy.
Sondaı-aq, ol «Jibek Joly» telearnasy Qazaqstandaǵy alǵashqy jobany júzege asyryp, mýltfılmderdi sýrdo-aýdarmaǵa avtomattandyrý jumystaryn júrgizgenin atap ótti.
— Daıyn sýfler men mátinder arqyly ym tilin aýdarý 3-4 aı ýaqytqa sozyldy, Fıksık mýltfılminiń ázirleýshilerimen avatardyń syrtqy kelbeti boıynsha kelissózder júrgizdik. Al mýltfılmdi aýdarý jumystary bir aı ýaqyt aldy, - dedi joba avtory.
Joba birneshe pılottyq synaqtan ótken. Qazir TJM-men kelisimshartqa daıyndyq júrip jatyr, Eńbek Skills-pen pılottyq joba iske qosý josparlanǵan. Komanda qosymsha bilim berý uıymdarynyń kontentin de aýdaryp, bilimge qoljetimdilikti arttyryp keledi.
Aldaǵy basty maqsat - sýrdoavatardyń qımylyn shynaıy deńgeıge jaqyndatý. Ol úshin Danııadan arnaıy sensorlarǵa tapsyrys berilgen. Bolashaqta júıe qoldanysqa yńǵaıly qosymsha modýl formatynda usynylmaq.
Aıta keteıik, buǵan deıin jasandy ıntellektiniń kómegimen ym tilin qazaqshalaý jobasyn qolǵa alǵan ǵalym Nurzada Amangeldi jaıly jazǵan edik.