IM lańkesteri Túrkııaǵa ses kórsetetin vıdeo jarııalady
ASTANA. QazAqparat - «Islam memleketi» sodyrlary Túrkııa men Mosýlǵa shabýyl jasaǵan koalıtsııa kúshterine aıbat shekken vıdeo jarııalady, dep habarlaıdy Reuters agenttigi.
Jelide «Islam memleketiniń» basshysy Ábý Bakr ál-Baǵdadıdyń joldaýy paıda boldy. Ol Túrkııany «dinsizderdiń odaqtasy» dep atap, oǵan shabýyl jasaýǵa shaqyrady, dep jazdy RBK.
Odan bólek, habarlamada Mosýlǵa shabýyldaǵan koalıtsııa qatysýshylaryna da ses kórsetip, Mosýl men Nınevııa provıntsııasynyń turǵyndaryn IM mańyna birigýge shaqyrady. Reuters agenttiginiń jazýynsha, bul málimdeme Iraktyń soltústigin azat etý operatsııasy bastalǵaly lańkester basshysynyń alǵash ret shyǵýy. Sońǵy aıda ál-Baǵdadıdyń ornalasqan jeriniń birneshe nusqasy boldy. Fars agenttigi Iraktaǵy derekkózderge súıenip, lańkester basshysynyń aýyr jaralanyp, kóp uzamaı qaıtys bolǵanyn habarlaǵan edi. Bul taqyrypqa málimdemeniń bolmaýyn uıym jaqtastarynyń qashyp ketýine jol bermeý úshin sodyrlardyń óz kóshbasshylarynyń ólimin habarlaǵysy kelmeýimen túsindirildi. Ózge nusqa boıynsha, ál-Baǵdadı Mosýlda jasyrynyp otyr nemese sodyrlar ózderiniń astanasy dep sanaıtyn Rakka qalasyna qashyp ketýi múmkin.
