Ilon Masktiń ulynyń obrazy jelide qyzý talqyǵa tústi
ASTANA. KAZINFORM — Ilon Masktiń alty jastaǵy uly X Beıjińdegi Halyq jınalysy saraıynda qytaı stılindegi obrazben kórinip, áleýmettik jelilerde keńinen talqylandy, dep habarlady Lianhe Zaobao.
14 mamyr kúni tańerteń X ákesi Ilon Maskpen birge Beıjińdegi resmı is-sharaǵa qatysqan. Kópshiliktiń nazaryn onyń dástúrli qytaı stılindegi kókshil tústi jıleti men qolyndaǵy jolbarys beınesindegi shaǵyn sómkesi aýdardy. Oqıǵa ornynan túsirilgen foto jáne vıdeolar qytaılyq áleýmettik jelilerde tez taralyp, sheteldik platformalarda da qyzý pikirtalas týdyrdy.
Qytaılyq BAQ málimetinshe, X kıgen qytaı stılindegi tabıǵı jibekten tigilgen jılet Qytaıdaǵy « Shýı tsaı chý谁裁初» atty shaǵyn dızaınerlik brendke tıesili. Kıim 100% tabıǵı jibekten daıyndalǵan. Brend ókilderiniń aıtýynsha, dál osy modeldiń ata-ana men balaǵa arnalǵan nusqasy resmı saýda platformasynda 970 ıýanǵa baǵalanǵan. Sonymen qatar brend jeke tapsyryspen tigý qyzmetin de usynady. Al tapsyrysty oryndaý merzimi shamamen 15–20 jumys kúni.
Al X qolyna ustaǵan jolbarys pishinindegi sómkeni keı jeli qoldanýshylary bastapqyda «aıdahar sómkesi» dep oılaǵan. Keıin onyń Qytaıdyń soltústik-batys óńirlerindegi dástúrli jolbarys bas kıimi men aıaqkıiminen shabyt alyp jasalǵany belgili boldy.
Bul buıymdy Qytaıdyń Gýansı ólkesindegi « ıA sıao tsı shoýchýan芽小七手创» atty jergilikti brend shyǵarady. Brend ókilderiniń aıtýynsha, sómke jergilikti kesteshilerdiń qolymen tigiledi. Qazirgi ýaqytta onyń baǵasy jeńildikpen 338 ıýan.
Jeli qoldanýshylary Masktiń ulynyń qytaı stılindegi obrazyna oń baǵa bergen. Al Ilon Mask áleýmettik jelidegi X paraqshasynda qytaı tilinde jaýap berip: «Ulym qazir qytaı tilin úırenip júr», — dep jazdy.
Aıta keteıik, AQSh prezıdenti Donald Tramp Qytaıǵa memlekettik sapary barysynda Qytaı tóraǵasy Sı Tszınpınmen kelissózder ótkizip, ony bıyl qyrkúıek aıynda AQSh-qa kelýge shaqyrdy.
