Ilon Masktyń X áleýmettik jelisine jazylý eki elde aqyly boldy

Buryn Twitter dep atalǵan X áleýmettik jelisi jańa paıdalanýshylardan negizgi fýnktsııalarǵa qol jetkizý úshin jylyna 1 dollar tólem ala bastady. Kazinform bul týraly The Guardian basylymyna silteme jasap habarlaıdy.

Áleýmettik jeli qyzmetterin paıdalanǵany úshin tólem ázirge synaq merzim aıasynda Jańa Zelandııa men Fılıppınde ǵana engizilgen.

Aqyly múmkindikterge H-te jazý, retvıt jasaý, ıaǵnı bireýdiń nemese óziniń tvıtin qaıta jarııalaý, lúpil basý jáne habarlamalarǵa jaýap berý kiredi. Abonenttik tólemnen bas tartqandar tek jarııalanymdardy oqı alady, beınelerdi kóre alady jáne akkaýnttarǵa jazyla alady.

Platformanyń málimdeýinshe, bul tólem áleýmettik jelide spam men burmalaýdy azaıtý, sondaı-aq bot belsendiligin azaıtý úshin engizilgen.

X ıesi Ilon Mask negizgi múmkindikteri joq tek oqýǵa arnalǵan tirkelgilerdi áli de tegin jasaýǵa bolatynyn aıtqanymen, Jańa Zelandııa men Fılıppındegi jańa paıdalanýshylar da telefon nómirin rastaýy tıis.

Ótken aıda X, Tesla jáne SpaceX basshysy X-tiń barlyq paıdalanýshylary endi jelige kirý úshin aqy tóleýi múmkin ekenin aıtty.

Masktyń pikirinshe, jańa paıdalanýshylardan aqy alý týraly sheshim jarnamadan túsetin tabysqa balama bolýy múmkin. Ol X «barlyq nársege», sonyń ishinde tólem qyzmetterine arnalǵan qosymshaǵa aınalady dep sendiredi. Mask Twitter áleýmettik jelisin satyp alǵannan keıin onyń jarnamadan túsken tabysy 60%-ǵa tómendedi.