Ilon Masktyń Optimus jobasy: adamtektes robottar dáýiri jaqyndap keledi

ASTANA. KAZINFORM – Ilon Mask tanystyrǵan adamtektes robot Optimus qazir Tesla kórmelerinde, zaýyttarynda jáne túrli sharalarda jıi kórsetilýde. Biraq Mask bul jobany shoý úshin emes, adamnyń kúndelikti ómirin jeńildetetin tehnologııa retinde qarastyrady, dep habarlaıdy BBC.

Mask Optimus-ty alǵash ret 2022 jyly tanystyrǵan edi. Onyń aıtýynsha, mundaı robottar bolashaqta úılerde, turmysta jáne óndiriste keńinen qoldanylady. Investorlar da bul ıdeıany qoldap otyr, Masktyń trıllıon dollarlyq syıaqy paketi dál osy jobalardyń tabysyna táýeldi.

Kompanııa aldaǵy 10 jylda bir mıllıonǵa jýyq robot shyǵarýdy josparlaıdy.

Sarapshylardyń pikirinshe, gýmanoıd robottar jaqyn jyldary qoıma, meıramhana, kútim jáne kúzet salalarynda keńinen qoldanylýy múmkin. Tesla basshysy tipti Optimus jobasy avtokólik óndirisinen de tabysty bolatynyna senimdi.

Degenmen, keıbir ınjenerler adam beınesindegi robottardyń praktıkalyq turǵydan tıimsiz ekenin aıtady. Aıaq-qol mehanıkasy kúrdeli ári qymbat, al dońǵalaqtar áldeqaıda tıimdi.

Alaıda psıhologtar mundaı robottar adamdarǵa senimdirek áser etetinin atap ótedi.

Optimus búginde qyzmet kórsetý salasynda synaqtan ótip júr, robottar dámhanalarda taǵam taratyp, tipti bı bıleýde.

OpenAI basshysy Sem Altmannyń aıtýynsha, «álem mundaı tehnologııaǵa áli daıyn emes, biraq bul tek ýaqyttyń máselesi».

Tesla-nyń ambıtsııasy men Masktyń tabandylyǵyn eskersek, adamtektes robottar dáýiri qııal emes, jaqyn bolashaqtyń shyndyǵyna aınalýy ábden múmkin.

Aıta keteıik, Ilon Masktyń foto men vıdeo jasaýǵa arnalǵan neırondyq jelisi tegin boldy.