Ilon Masktyń kompanııasy álemdegi eń úlken sýperkompıýterdi jasaıdy
ASTANA. KAZINFORM – Ilon Masktyń X.AI kompanııasy Memfıste (Tennessı, AQSh) álemdegi eń úlken sýperkompıýter qurastyrady. Bul týraly WREG jańalyqtar arnasynda Úlken Memfıs Caýda palatasynyń basshysy Ted Taýnsend málimdedi, dep habarlaıdy TASS aqparat agenttigi.
«X.AI Gigafactory of Compute («esepteý qýattylyqtarynyń gıgafaborıkasy») álemdegi eń úlken sýperkompıýter Memfıste ornalasatynyn qýana habarlaımyn. Adamdardy Marsqa jiberý úshin qajetti esepteý resýrstaryn elestetip kórińiz. Olar osynda Memfıste bolady», - dedi ol.
Saýda palatasy basshysynyń aıtýynsha, joba iske asyrý úshin Memfıs pen Shelbı okrýginiń ekonomıkalyq damý organdarynan, Tennessı ózeniniń alqabynyń ákimshiliginen jáne basqa da birneshe agenttikterden ruqsat alý talap etiledi.
Sýperkompıýter jasandy ıntellekt (JI) negizindegi júıelerdi jedeldetýge arnalǵan Nvidia H100 grafıkalyq protsessorlarymen jumys isteıtini belgili. Ol buryn turmystyq tehnıka shyǵaratyn shvetsııalyq Electrolux Group kompanııasyna tıesili zaýytta ornalasatyny shamalanyp otyr.
Taýnsend X.AI kompanııasymen sýperkompıýter jasaý týraly kelissózder osy jyldyń naýryz aıynda bastalǵanyn aıtty. Buǵan deıin Mask óziniń startapy 2025 jyldyń kúzine qaraı sýperkompıýter shyǵarýdy josparlap otyrǵanyn málimdegen.
